Ціханоўская заклікала Дуду ўключыць дэмакратычную Беларусь у фармат Люблінскага трохкутніка
Святлана Ціханоўская і Анджэй Дуда на перамовах у Варшаве 9 студзеня 2024 года
10 студзеня, Позірк. Уключыць дэмакратычную Беларусь у фармат Люблінскага трохкутніка заклікала Святлана Ціханоўская прэзідэнта Польшчы Анджэя Дуду на перамовах 9 студзеня ў Варшаве. Пра гэта паведаміў “Позірку” галоўны дарадца беларускага дэмакратычнага лідара Франак Вячорка.
Паводле яго слоў, бакі абмеркавалі магчымыя сумесныя мерапрыемствы на працягу 2024 года ў рамках гэтага рэгіянальнага ўтварэння*, ініцыянаванага ў 2020 годзе Польшчай, Літвой і Украінай.
“Дуда выказаў падтрымку Святлане Ціханоўскай і беларускаму народу ў барацьбе за свабоду, падкрэсліўшы, што Польшча падтрымлівала і падтрымлівае беларускую грамадзянскую супольнасць і СМІ, а сам ён на кожнай міжнароднай сустрэчы, на кожным міжнародным мерапрыемстве паказвае на важную ролю Беларусі для бяспекі ўсёй Еўропы”, — адзначыў Вячорка.
На сустрэчы разгледжаная сітуацыя ўнутры Беларусі і ва Украіне. Ціханоўская зноў заклікала зрабіць усё магчымае, каб Беларусь не стала суцяшальным прызам для Крамля. Абмеркаваны “сумесныя мерапрыемствы ў міжнародных арганізацыях і сумесныя дзеянні ў ААН”. Ціханоўская распавяла пра сітуацыю з палітвязнямі, у тым ліку журналістам, адным з актывістаў польскай меншасці Анджэем Пачобутам, якога трымаюць у рэжыме інкамунікада — інфармацыйнай ізаляцыі. Ціханоўская “заклікала патрабаваць вызвалення палітвязняў і працягваць ціск на рэжым з гэтай мэтай, а таксама падтрымаць інструменты, механізмы для прыцягнення рэжыму да адказнасці за рэпрэсіі супраць беларусаў і супраць Украіны, у тым ліку дэпартацыю ўкраінскіх дзяцей”.
Паводле інфармацыі Вячоркі, у канцы сустрэчы Ціханоўская ўручыла Дудзе Крыж добрасуседства — узнагароду Аб’яднанага пераходнага кабінета, якая ўручаецца палітыкам, у тым ліку вышэйшым службовым асобам, за падтрымку беларусаў у барацьбе за свабоду. Акрамя Дуды гэтай узнагароды былі ўдастоены прэзідэнт Еўрапарламента Раберта Метсола, міністр замежных спраў Швецыі Тобіас Більстром, міністр замежных спраў Польшчы Радаслаў Сікорскі.
* Пра неабходнасць ўключэння Беларусі ў Люблінскі трохкутнік заявіў “Позірку” ўкраінскі палітолаг Яўген Магда. З яго каментаром можна азнаёміцца тут.
Гл. таксама па тэме:
Ціханоўская: Дыктатура ў Беларусі абрынецца, а беларуска-польскія адносіны застануцца на стагоддзі
