Маці палітыка Паўла Севярынца пасля затрымання трапіла ў бальніцу

10 студзеня, Позірк. Маці палітыка Паўла Севярынца, які знаходзіцца ў зняволенні, Таццяна Севярынец, затрыманая раніцай 9 студзеня ў Віцебску, трапіла ў бальніцу, паведаміла ў сацыяльных сетках яе дачка Ганна Севярынец.

“Мама ў бальніцы з ціскам. Ну, прынамсі, ночыла на матрасе, і на тым, Сусвеце, дзякуй”, — напісала яна.

Пасля затрымання маці Ганна Севярынец паведаміла, што фармальнай прычынай для таго сталі “падпіскі ў “Фэйсбуку”, якіх у той “даўно не было”.

Сын затрыманай — вядомы апазіцыйны палітык Павел Севярынец — прызнаны палітвязнем. Быў затрыманы 7 чэрвеня 2020 года, у разгар кампаніі па зборы подпісаў за вылучэнне кандыдатаў у прэзідэнты. Ён у гонцы не ўдзельнічаў, але выкарыстоўваў перадвыбарчы перыяд для зносін з людзьмі. У той дзень сустаршыня БХД правёў на плошчы ля сталічнага Камароўскага рынку “народны пікет свабоды і салідарнасці”.

25 траўня 2021 года Магілёўскі абласны суд прыгаварыў Севярынца да 7 гадоў калоніі ўзмоцненага рэжыму паводле абвінавачання ў “падрыхтоўцы да масавых беспарадкаў”.

27 жніўня таго ж года Вярхоўны суд не задаволіў скаргу на прыгавор.

23 сакавіка 2022 года апазіцыйны палітык быў унесены ў пералік асоб, “датычных да экстрэмісцкай дзейнасці”, а 21 чэрвеня суд Шклоўскага раёна (Магілёўская вобласць) змяніў рэжым утрымання палітвязня — пастанавіў накіраваць яго ў турму на 3 гады.

30 снежня 2023 года палітыку споўнілася 47 гадоў.