Ціханоўская абмеркавала з міністрам спорту Польшчы падтрымку беларускіх рэпрэсаваных атлетаў

10 студзеня, Позірк. Беларускі дэмакратычны лідар Святлана Ціханоўская, прадстаўнік Аб’яднанага пераходнага кабінету (АПК) па транзіце ўлады Павел Латушка і яго намеснік Міхаіл Залеўскі на сустрэчы 9 студзеня ў Варшаве абмеркавалі з міністрам спорту Польшчы Славамірам Нітрасам падтрымку беларускіх рэпрэсаваных атлетаў і магчымасць іх удзелу ў Алімпійскіх гульнях і іншых спаборніцтвах.

Прэс-служба АПК адзначае, што Ціханоўская і прадстаўнікі кабінету звярнулі ўвагу на тое, што беларускім “незалежным спартсменам” неабходныя ўмовы для трэніровак і іншая падтрымка з боку Польшчы.

Таксама бакі абмеркавалі пытанне нядопуску да міжнародных стартаў спартсменаў, якія падтрымалі рэжым Лукашэнкі і палітычныя рэпрэсіі.

9 студзеня Ціханоўская, прадстаўніца па нацыянальным адраджэнні АПК Аліна Коўшык і яе намеснік Павел Баркоўскі, намеснік прадстаўніка па транзіце ўлады Юрый Губарэвіч правялі працоўную сустрэчу з намеснікам міністра навукі і вышэйшай школы Польшчы прафесарам Анджэем Шэптыцкім, профільнымі супрацоўнікамі міністэрства, а таксама са спецпрадстаўніком па справах дэмакратычнай Беларусі Артурам Міхальскім.

Ціханоўская надала асаблівую ўвагу адукацыйным праграмам польскіх уладаў, якія сталі важнымі сімваламі падтрымкі Беларусі і яе грамадзянскай супольнасці. Гаворка ішла пра праграму Каліноўскага, Вольны ўніверсітэт і Цэнтр усходнееўрапейскіх даследаванняў Варшаўскага ўніверсітэта.

Коўшык адзначыла, што больш за 12 тыс. беларускіх студэнтаў навучаюцца ў Польшчы: “Гэта дазваляе ім атрымліваць добрую еўрапейскую адукацыю і вопыт жыцця ў дэмакратычным асяроддзі, што супрацьстаіць тэндэнцыі на атрыманне вышэйшай адукацыі ў Расіі”.

Таксама Коўшык падкрэсліла, што важна ўзмацняць ініцыятывы па падтрымцы беларускай навукі за мяжой.