Камітэт ААН па правах чалавека зарэгістраваў зварот юрыста-палітвязня Знака

10 студзеня, Позірк. Камітэт ААН па правах чалавека (КПЧ) 10 студзеня зарэгістраваў індывідуальны зварот юрыста-палітвязня Максіма Знака, пададзены 4 лютага 2023 года, паведамляе праект дапамогі незалежным адвакатам “Права на абарону”.

У накіраваным КПЧ дакуменце заяўлена аб дыскрымінацыйным характары пераследу Знака, парушэнні яго права на свабоду, справядлівае судовае разбіральніцтва, свабоду выказвання меркавання і свабоду асацыяцый.

Адзначаецца, што ў адпаведнасці з правіламі працэдуры КПЧ дзяржаве прадастаўляецца магчымасць на працягу шасці месяцаў з моманту рэгістрацыі (у выпадку Знака не пазней за 10 ліпеня 2024 года) прадставіць свае каментары на зварот.

Падкрэсліваецца, што КПЧ упаўнаважаны даваць прававую ацэнку на прадмет парушэння дзяржавай правоў чалавека, пры гэтым экспертнае меркаванне камітэта нікім не можа быць аспрэчана.

“Права на абарону” звяртае ўвагу, што нягледзячы на дэнансацыю Беларуссю факультатыўнага пратаколу да Міжнароднага пакта аб грамадзянскіх і палітычных правах, за беларускай дзяржавай захоўваюцца ўсе абавязацельствы ў дачыненні да індывідуальных зваротаў, пададзеных да даты ўступлення рашэння аб дэнансацыі ў сілу (да 8 лютага 2023 года).

У траўні 2022 года рабочая група па адвольных затрыманнях ААН прызнала, што пазбаўленне Знака свабоды не мела прававых падстаў і ён павінен быць безумоўна вызвалены; група спецыяльных дакладчыкаў ААН таксама заклікала ўлады Беларусі вызваліць адваката, як затрыманага па палітычных матывах.

Праваабаронцы адзначаюць, што адміністрацыя папраўчай калоніі №3 (пасёлак Віцьба Віцебскага раёна), дзе знаходзіцца юрыст, не дае яму спатканняў са сваякамі і не дапускае да адваката. Знак пазбаўлены тэлефонных званкоў і перапіскі.

“Такое стаўленне да зняволеных у міжнароднай практыцы прызнаецца катаваннямі”, — падкрэсліваюць аўтары “Права на абарону”.

Максім Знак — юрыст, прадстаўнік штаба экс-банкіра Віктара Бабарыкі, які прэтэндаваў на пасаду прэзідэнта, член Каардынацыйнай рады па ўрэгуляванні палітычнага крызісу ў Беларусі. 6 верасня 2021 года асуджаны на 10 гадоў пазбаўлення волі паводле арт. 361 (заклікі да дзеянняў, накіраваных на прычыненне шкоды нацыянальнай бяспецы), арт. 357 (змова з мэтай захопу ўлады неканстытуцыйным шляхам), арт. 361¹ (стварэнне экстрэмісцкага фармавання або ўдзел у ім) Крымінальнага кодэкса.

Гл. таксама:

Затрыманне Віктара Бабарыкі — парушэнне яго права на свабоду, прызнаў КПЧ ААН

Рабочая група ААН па адвольных затрыманнях прызнала арышт журналіста Лосіка парушэннем права