У 2023 годзе доля МАЗа на расійскім рынку новых грузавікоў знізілася

12 студзеня, Позірк. У 2023 годзе на расійскім рынку прададзена 6.333 новых грузавікоў Мінскага аўтамабільнага завода — на 43,8% больш, чым годам раней (4.405), гаворыцца ў даследаванні аналітычнага агенцтва “Аўтастат” (РФ).

Прадукцыя мінскага прадпрыемства заняла 7-е месца (у 2022-м — 5-е) у спісе самых прадаваных брэндаў гэтага сегмента аўтарынка Расіі, канстатуюць эксперты.

Доля МАЗа на рынку РФ склала 4,41% (5,24%).

У пяцёрку лідараў рэалізацыі ўвайшлі расійскі КамАЗ (31.010 шт.; -1,6%), кітайскія SITRAK (23.633; рост продажаў у 6,3 разы), Ѕһасмаn (20.760; у 2,1 разы), FAW (15.804; у 3,5 разы), HOWO (6.938; у 2 разы).

Усяго ў 2023 годзе на рынку РФ рэалізавалі 143.693 новых грузавікоў (+70,8%).

15 чэрвеня першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер з-за актыўнай экспансіі кітайскіх вытворцаў”.

“Гаворка не проста аб павышэнні імпартных пошлін, тут поля для манеўру амаль няма. Я маю на ўвазе антыдэмпінгавыя і спецабаронныя меры”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі “відавочная”, а дынаміка іх продажаў “пужальная”.