Агульны тэрмін па ўсіх вынесеных у 2023 годзе палітычна матываваных выраках складае 2.996 гадоў — “Вясна”

15 студзеня, Позірк. Агульны тэрмін па вынесеных летась у Беларусі палітычна матываваных выраках (улічаныя ўсе віды пакарання) складае 2.996 гадоў, вынікае з апублікаванага 15 студзеня агляду праваабарончага цэнтра “Вясна”.

Згодна з дакументам, 458 чалавек асуджаныя сумарна на 1.935 гадоў пазбаўлення волі, 389 — на 854 года абмежавання волі без накіравання ў папраўчую ўстанову адкрытага тыпу (ПУАТ), 51 чалавек — на 106 гадоў абмежавання волі ў ПУАТ. Акрамя таго, 18 чалавек атрымалі агулам 4 гады арышту, адзін прыгавор быў вынесены з адтэрміноўкай выканання. Сямі грамадзянам прызначана штрафаў у агульнай складанасці на 2.700 базавых велічыняў (99,9 тыс. рублёў пры мінулагодняй б.в. — 37 рублёў), яшчэ пяць адпраўлена на прымусовае лячэнне.

За мінулы год праваабаронцы сабралі звесткі не менш 1.603 асуджаных з палітычных матываў (мужчыны — 73%). Па вядомых выпадках больш за ўсё палітычных выракаў было вынесена ў Мінску (57%), далей ідуць Брэсцкая і Гомельская вобласці (па 10%), Мінская (8%), Гродзенская (7%), Магілёўская (5%) і Віцебская (3%).

Больш за ўсё з палітычных матываў асуджана паводле арт. 342 КК (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх) — 863 чалавекі. Паводле арт. 368 (абраза прэзідэнта) — 324 чалавекі, арт. 369 (абраза прадстаўніка ўлады) — 187, арт. 130 (распальванне <…> варожасці або варажнечы) — 162.