На форуме ў Давосе Ціханоўская паспрабуе “знайсці новых саюзнікаў”

15 студзеня, Позірк. На Сусветным эканамічным форуме ў Давосе (Швейцарыя) дэмакратычны лідар Святлана Ціханоўская пастараецца “знайсці новых саюзнікаў у свеце”, а таксама абмяркуе “лепшы вопыт тых краін, якія прайшлі шлях ад дыктатуры да дэмакратыі”. Пра гэта палітык заявіла ў сваім тэлеграм-канале 15 студзеня па прыбыцці ў Давос.

Паводле яе слоў, “сярод іншага” яна выступіць на форуме на тэму “бяспекі ў рэгіёне і ролі Беларусі”. “Мы павінны выцягнуць Беларусь з вайны”, — сказала Ціханоўская.

“Я буду прасіць аказаць нам дапамогу ў падрыхтоўцы рэформаў. Нам важна ўжо цяпер думаць пра Беларусь пасля дыктатуры. Беларусь можа стаць і абавязкова стане самастойнай і багатай краінай. Гэтыя кантакты дапамогуць нам у будучыні прыцягнуць у Беларусь новыя інвестыцыі”, — адзначыла палітык.

Яна таксама анансавала абмеркаванне тэмы беларускіх палітвязняў, бо гэта сёння — “наш галоўны і агульны боль”. “Ім неабходная падтрымка на пастаяннай аснове, — дадала Ціханоўская. — Я буду прасоўваць ідэю стварэння міжнароднага фонду дапамогі рэпрэсаваным, былым палітвязням і іх сем’ям”.

“І, вядома, мы будзем шукаць падтрымку для медыя, прыватнага бізнесу, грамадскіх актывістаў. Нам трэба вяртаць Беларусь у міжнародны парадак дня, таму я тут, у Давосе”, — рэзюмавала Ціханоўская.

Сусветны эканамічны форум пройдзе 15–18 студзеня. Як раней паведаміў “Позірку“ галоўны дарадца Ціханоўскай Франак Вячорка, у Давосе дэмсілы атрымаюць магчымасць “абмеркаваць дэмакратычную будучыню Беларусі і пагутарыць з сусветнымі лідарамі па актуальных міжнародных пытаннях”.

Ён анансаваў выступ Ціханоўскай на панэльнай дыскусіі “Абараняючы адзіны фронт Еўропы”, у якой таксама будуць удзельнічаць прэзідэнт Польшчы Анджэй Дуда, прэзідэнт Венгрыі Каталін Новак, а таксама прэм’ер-міністр Харватыі Андрэй Пленкавіч.

Сітуацыя з медыя будзе ў цэнтры ўвагі на панэлі “Куды ідзе свабода выказвання меркаванняў?” Разам з дэмакратычным лідарам у гэтай частцы форуму возьмуць удзел выканаўчы дырэктар Human Rights Watch Тырана Хасан, упраўляючы рэдактар New York Times Джозэф Кан, галоўны рэдактар Deutsche Welle Мануэла Каспер-Кларыдж.

Паводле слоў Вячоркі, Ціханоўская таксама будзе ўдзельнічаць у некалькіх мерапрыемствах з удзелам генеральнага сакратара ААН Антоніу Гутэрыша, каралевы-кансорта Нідэрландаў Максімы, прэзідэнта Латвіі Эдгарса Рынкевічса, прэзідэнта Тымора-Лешці (Усходняга Тымора) Жазэ Мануэла Рамуша-Орты, гендырэктара Сусветнай гандлёвай арганізацыі Нгозі Аконджа-Івеалы, генсакратара Арганізацыі эканамічнага супрацоўніцтва і развіцця Маціяса Кормана і інш.

“Таксама беларускі лідар правядзе мноства двухбаковых сустрэч, у тым ліку са спікерам парламента Філіпін. Гэта будзе яе першы афіцыйны кантакт з гэтай краінай. Таксама Ціханоўская плануе сустрэцца з прадстаўнікамі міжнароднага бізнесу і тэхналагічных кампаній”, — адзначыў галоўны дарадца палітыка.