У памежжы з Літвой затрыманы мужчына з БПЛА — ДПК

16 ліпеня, Позірк. У гарадскім пасёлку Радунь Воранаўскага раёна (Гродзенская вобласць) 15 ліпеня затрыманы мужчына з беспілотным лятальным апаратам, акумулятарнымі батарэямі і пультам дыстанцыйнага кіравання, паведамляе прэс-служба Дзяржаўнага пагранічнага камітэта.

Затрыманне ў памежжы з Літвой праводзілі вайскоўцы Лідскага пагранатрада пры сілавой падтрымцы АМАПа УУС Гродзенскага аблвыканкама.

Адзначаецца, што БПЛА і камплектуючыя канфіскаваныя і дастаўленыя ва ўпраўленне Лідскага памежнага атрада. На затрыманага складзены адміністрацыйны пратакол паводле ч. 1 арт. 24.19 КаАП (парушэнне памежнага рэжыму).

ДПК нагадвае, што забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы Беларусі без спецыяльнага дазволу.

Акрамя таго, незаконнае ўтрыманне і выкарыстанне беспілотнікаў у памежнай зоне альбо памежнай паласе цягнуць накладанне штрафу да 50 базавых адзінак (2.100 рублёў) паводле арт. 24.19 КаАП.

30 чэрвеня дэпутаты Палаты прадстаўнікоў Нацыянальнага сходу (ПП НС) у першым чытанні прынялі праект закона “Аб змяненні кодэксаў па пытаннях крымінальнай і адміністрацыйнай адказнасці”, які прадугледжвае сярод іншага адказнасць за дзеянні з беспілотнымі лятальнымі апаратамі.

Прэс-служба ніжняй палаты парламента паведамляла, што пасля ўступлення ў сілу адпаведнага закона грамадзян, якія парушылі забарону на ўвоз, захоўванне, абарот, эксплуатацыю і выраб грамадзянскіх беспілотнікаў, устаноўленага ўказам № 297 ад 25 верасня 2023 года, чакае адміністрацыйная адказнасць, а паўторнае здзяйсненне гэтых дзеянняў на працягу года пасля накладання адміністрацыйнага спагнання пацягне ўзбуджэнне крымінальнай справы.