У Мінску 29 студзеня пачнецца працэс над менеджарам Нацбанка, абвінавачаным у “экстрэмізме”

19 студзеня, Позірк. Мінскі гарадскі суд 29 студзеня пачне разгляд крымінальнай справы галоўнага спецыяліста галоўнага ўпраўлення наяўнага грашовага абароту Нацыянальнага банка Аляксандра Цярэшчанкі, паведамляе праваабарончы цэнтр “Вясна”.

Менеджара абвінавачваюць паводле арт. 361² Крымінальнага кодэкса (фінансаванне экстрэмісцкай дзейнасці).

Весці працэс будзе суддзя Сяргей Кацэр.

Падрабязнасці справы невядомыя.

Раней на дзяржаўным тэлебачанні паказалі відэа, на якім Цярэшчанка кажа аб сваім удзеле ў акцыях пратэсту, рэпостах у сацсетках публікацый аб прэзідэнцкіх выбарах і пандэміі каронавіруса. У тэлеэфіры яго назвалі афіцэрам і “кіраўніком КДБ Барысаўскага раёна”, адзначаюць праваабаронцы.