Кавалеўскі: МЗС Беларусі ў цяперашнім выглядзе з’яўляецца піяр-агенцтвам дыктатара

22 студзеня, Позірк. МЗС Беларусі ў цяперашнім выглядзе з’яўляецца “піяр-агенцтвам крымінальнага дыктатара”, адзначыў на сваёй старонцы ў Х былы беларускі дыпламат, прадстаўнік Аб’яднанага пераходнага кабінета (АПК) па міжнародных справах Валерый Кавалеўскі ў сувязі з Днём дыпламатычнага работніка, які адзначаецца 22 студзеня.

Адзначыўшы, што “дыпламатыя не з’яўляецца такой, калі яна не адстойвае нацыянальныя інтарэсы”, прадстаўнік АПК назваў беларускае МЗС “антыбеларускай службай”, якая належыць Аляксандру Лукашэнку. На думку Кавалеўскага, беларускае знешнепалітычнае ведамства “падпарадкоўваецца расіянам, якія адкрыта баяцца і пагарджаюць усім беларускім і глядзяць на бюракратаў Лукашэнку як на непаўнавартасных”.

22 студзеня 1919 года з’явілася першае публічнае паведамленне ў газеце “Звязда” аб пачатку дзейнасці Камісарыята па замежных справах Сацыялістычнай Савецкай Рэспублікі Беларусь, у штаце якога было 12 чалавек.

Віншаванні з нагоды 105-годдзя беларускай дыпламатычнай службы яе прадстаўнікам накіравалі Лукашэнка і МЗС Расіі.