23 студзеня, Позірк. Камітэт дзяржаўнай бяспекі 16 студзеня прызнаў “экстрэмісцкім фарміраваннем” “Беларускае Радыё Рацыя”, якое працуе з польскага Беластоку.
У абноўленым спісе на сайце Міністэрства ўнутраных спраў асобамі, датычнымі да гэтага “фарміравання”, пазначаныя “грамадзянін Рэспублікі Польша Wappa Eugeniusz” (старшыня праўлення Яўген Вапа) и “грамадзянін Рэспублікі Беларусь Валошын Яўген Юр’евіч” (журналіст).
У докуменце пералічаныя сайт “Радыё Рацыя”, яго старонкі ў “Інстаграме”, “УКантакце”, “Фэйсбуку”, “Тэлеграме”, Х, а таксама ютуб-канал.
“Радыё Рацыя” знаходзіцца пад юрысдыкцыяй Польшчы. Згодна з інфармацыяй на сайце медыя, яно “суфінансуецца ў рамках польскага супрацоўніцтва ў галіне развіцця Міністэрства замежных спраў Рэспублікі Польшча”.
У кастрычніку 2023 года суд прызнаў “экстрэмісцкімі матэрыяламі” кантэнт тэлеграм-канала, старонкі ў “Фэйсбуку” і лагатып “Радыё Рацыя”.
16 студзеня КДБ таксама прызнаў “экстрэмісцкім фарміраваннем” групу грамадзян “з ліку стваральнікаў, адміністратараў і ўдзельнікаў” тэлеграм-канала “КОТОС: местное самоуправление”. Да гэтай ініцыятывы, як сцвярджае спецслужба, маюць дачыненне Вольга Цесакова (былы дэпутат Мінгарсавета, якая ў 2020 годзе асудзіла дзеянні ўладаў) і Дзмітрый Кухлей.
У гэты ж дзень камітэт надаў статус “экстрэмісцкага фарміровання” праекту харчовай дапамогі INeedHelpBY на чале з Філіпам Гаўрышавым, а таксама супольнасці тэлеграм-канала “Триэлит” (датычнымі асобамі пазначаныя Павел Аляксееў, Кірыл Шчамялёў, Яніна Андраюк, Аляксей Чарнак, Уладзімір Балабановіч , Вадзім Рушкевіч, Юры Слабодчыкаў, Аляксандр Карцаў).
