Палітвязнямі прызнаныя яшчэ сем чалавек, у тым ліку фотажурналіст Зянкоў

23 студзеня, Позірк. Фотажурналіст і відэааператар з Барысава (Мінская вобласць) Аляксандр Зянкоў прызнаны палітвязнем, усяго такі статус 23 студзеня стрымалі сем чалавек, паведамляе праваабарончы цэнтр “Вясна”.

Зянкова затрымалі 22 чэрвеня 2023 года ў яго доме ў Барысаве. 12 студзеня яго справу пачалі разглядаць у Мінскім гарадскім судзе. Чарговае пасяджэнне прызначана на 25 студзеня.

Журналіста абвінавачваюць паводле ч. 3 арт. 361¹ Крымінальнага кодэкса (стварэнне экстрэмісцкага фарміравання або ўдзел у ім).

Зянкоў супрацоўнічаў з недзяржаўнымі СМІ, у тым ліку з барысаўскім сайтам ex-Press.by (цяпер ex-press.live), кантэнт якога двойчы прызнаваўся “экстрэмісцкімі матэрыяламі” (у кастрычніку 2021 года і лютым 2023-га). Рэдакцыя сайта была прылічаная да “экстрэмісцкіх фарміраванняў” у лістападзе 2023-га.

Палітвязнямі таксама прызнаныя Ксенія Хадырава, Віталь Максімчук, Галіна Краснянская, Ірына Бандарэнка, Надзея Каранкевіч і Аляксандр Бойка.

Хадырава, Бандарэнка і Каранкевіч узятыя пад варту ў рамках крымінальнай справы паводле арт. 361² КК (фінансаванне экстрэмісцкая дзейнасці) за ахвяраванні пратэстным ініцыятывам.

Максімчук затрыманы паводле арт. 361¹, Бойка — паводле ч. 1 арт. 361⁴ (садзейнічанне экстрэмісцкай дзейнасці) КК.

Краснянская прыгавораная да 5 гадоў пазбаўлення волі паводле ч. 2 арт. 361³ КК (удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка альбо падрыхтоўка асоб да такога ўдзелу).

У сваёй заяве праваабаронцы заклікалі ўлады спыніць палітычныя рэпрэсіі і вызваліць палітзняволеных.

Акрамя “Вясны” заяву падпісалі Human Constanta, “Прававая ініцыятыва”, Офіс па правах людзей з інваліднасцю і Беларускі дом правоў чалавека імя Барыса Звозскава.

На 23 студзеня ў Беларусі 1.415 палітвязняў.