Затрыманы журналіст, былы палітвязень Гардзіевіч — БАЖ

24 студзеня, Позірк. Экс-палітвязень і былы карэспандэнт незалежнага сайта навін “Першы рэгіён” (Драгічын, Брэсцкая вобласць) Сяргей Гардзіевіч затрыманы 24 студзеня, паведамляе Беларуская асацыяцыя журналістаў (БАЖ).

Паводле папярэдняй інфармацыі, яго абвінавачваюць у “распаўсюдзе, вырабе, захоўванні інфармацыйнай прадукцыі, якая ўтрымлівае заклікі да экстрэмісцкай дзейнасці” (арт. 19.11 КаАП). Падрабязнасцяў пакуль няма.

14 верасня 2023 года Гардзіевіча затрымалі на пагранпераходзе Брэст (з польскага боку — Цярэспаль) пасля праверкі тэлефона і пасля арыштавалі на 15 сутак паводле таго ж адміністрацыйнага артыкула.

У канцы снежня 2020 года журналіст быў затрыманы і пасля асуджаны на 1,5 года зняволення ва ўмовах агульнага рэжыму паводле арт. 369 (абраза прадстаўніка ўлады), арт. 368 (абраза прэзідэнта) і 188 (паклёп) Крымінальнага кодэкса. Выйшаў на волю 17 кастрычніка 2022 года. МУС унесла Гардзіевіча ў спіс асоб, якія маюць дачыненне да “экстрэмісцкай дзейнасці”.

Кантэнт “Першага рэгіёну” прызнаны “экстрэмісцкімі матэрыяламі”. Сайт па-ранейшаму працуе.