I Беларускі бізнес-форум у Вашынгтоне пройдзе 1 сакавіка — ABBA
30 студзеня, Позірк. Aсацыяцыя беларускага бізнесу за мяжой (ABBA) сумесна з Дэпартаментам гандлю Злучаных Штатаў Амерыкі правядзе 1 сакавіка І Беларускі бізнес-форум у Вашынгтоне, паведамляе прэс-служба ABBA.
Адзначаецца, што “прадстаўнікі бізнесу, топ-менеджары, палітыкі, фінансісты і актыўныя дзеячы беларускай дыяспары” абмяркуюць на форуме “запыты і патрэбы беларускага бізнесу ў ЗША і пытанні фармавання беларускай бізнес-супольнасці за мяжой”.
На сустрэчу запрашаюцца “прадпрымальнікі з беларускімі каранямі за мяжой, прадстаўнікі малога і сярэдняга бізнесу, а таксама буйныя бізнесоўцы і інвестары”. Чакаецца, што ўдзел у ёй возьмуць “беларусы ЗША, бізнесоўцы з Еўрапейскага саюза”.
Мэтамі форуму заяўленыя “пашырэнне геаграфіі беларускіх бізнесаў замежжа, абмен досведам і стварэнне спрыяльных умоў для далейшага развіцця эканамічнага сектару Беларусі будучыні”.
Запланаваныя “бізнес-панэлі з міжнароднымі экспертамі і прадстаўнікамі ўплывовых інстытуцый ЗША”, а таксама “выступы спікераў, натхняльныя гісторыі поспеху бізнесоўцаў з беларускімі каранямі; нэтворкінг”.
“Падчас форуму малое і сярэдняе прадпрымальніцтва атрымае выдатную магчымасць разгледзець пытанні маштабавання бізнесу, абмеркаваць варыянты крэдытавання і іншых крыніц фінансавання, — адзначана ў рэлізе. — Для буйных прадпрымальнікаў будуць створаныя ўмовы, каб абмеркаваць магчымасці ўдзелу ў тэндарах для беларускіх кампаній за мяжой, пазнаёміцца з новымі перспектывамі інвеставання, а таксама распавесці пра свае праблемы на федэральным узроўні ЗША”.
Паведамляецца, што ў форуме “возьме ўдзел больш за дваццаць спікераў з паспяховым досведам у розных галінах развіцця бізнесу”. На сустрэчы “будуць агучаныя пытанні падтрымкі беларускіх бізнесоўцаў замежжа з боку ЗША, будавання і развіцця беларускай бізнес-дыяспары”.
АВВА адкрыла прадстаўніцтва ў Крамянёвай даліне
17 лістапада, Позірк. Асацыяцыя беларускага бізнесу за мяжой (ABBA) адкрыла прадстаўніцтва ў Крамянёвай даліне (штат Каліфорнія, ЗША). Узначаліў прадстаўніцтва дарадца ABBA, прадпрымальнік Мікалай Мурзянкоў, паведаміла арганізацыя ў сваім телеграм-канале. "Мы запрашаем бізнесменаў з беларускімі каранямі звяртацца ў АВВА з пытаннямі …
