У кастрычніку міліцыя выняла больш як 1,5 тыс. адзінак зброі, звыш 11 тыс. боепрыпасаў, распачата 18 крымінальных спраў

19 кастрычніка, Позірк. Больш як 1,5 тыс. адзінак зброі вынята ў Беларусі па выніках аперацыі “Арсенал”, якая праводзілася 9–13 кастрычніка, вынікае з паведамлення прэс-службы Міністэрства ўнутраных спраў.

З абароту вынята 215 адзінак незарэгістраванай зброі і больш за 11 тыс. боепрыпасаў рознага калібру.

У грамадзян канфіскавана 326 адзінак зарэгістраванай зброі. Большасць з іх пазбавілася яго “за грэбаванне правіламі захоўвання і з прычыны прыцягнення да адказнасці за розныя правапарушэнні: хуліганства, прычыненне цялесных пашкоджанняў, кіраванне аўтамабілем у стане ап’янення” ды інш.

“Прафілактычная праца садзейнічала актыўнаму звароту грамадзян у органы ўнутраных спраў. У выніку добраахвотна здадзена амаль тысяча “руляў”, дзве траціны з якіх — зарэгістраваныя”, — гаворыцца ў паведамленні.

Паводле інфармацыі МУС, за час правядзення “Арсенала” распачата 18 крымінальных спраў за “незаконныя дзеянні ў дачыненні да агнястрэльнай зброі, звязаныя з яе захоўваннем, набыццём, перавозкай і іншымі супрацьпраўнымі дзеяннямі”. За розныя правапарушэнні ў гэтай сферы да адміністрацыйнай адказнасці прыцягнута 165 грамадзян.

4 кастрычніка, да пачатку аперацыі, МУС паведамляла, што ў 2023 годзе ў жыхароў Беларусі канфіскавана каля 2 тыс. адзінак зброі.