Экс-палітзняволеная Вольга Такарчук эвакуяваная з Беларусі, яе маці затрыманая па крымінальным артыкуле

9 лютага, Позірк. Былая палітзняволеная, блогер і дызайнер Вольга Такарчук эвакуяваная з Беларусі, паведаміў на сваёй старонцы ў “Фэйсбуку” сузаснавальнік фонду салідарнасці BySol праваабаронца Андрэй Стрыжак.

“Праз апошнюю аблаву [23 студзеня і ў наступныя дні] былая палітзняволеная была вымушаная звярнуцца ў эвакуацыйную службу фонду, — напісаў Стрыжак. — На жаль, маці Вольгі — 63-гадовая Ірына Такарчук — засталася ў палоне ў лукашыстаў”.

Пра затрыманне Ірыны Такарчук 9 лютага паведаміў праваабарончы цэнтр “Вясна”. Паводле інфармацыі праваабаронцаў, яе абвінавачваюць у “садзейнічанні экстрэмісцкай дзейнасці” (ч. 2 арт. 361⁴ Крымінальнага кодэкса). Жанчыну затрымалі 23 студзеня падчас масавага рэйду сілавікоў.

У той жа дзень затрымлівалі і Вольгу Такарчук. Адзначаецца, што пасля ператрусу яе даставілі ў КДБ, дзе дапытвалі аб атрыманні дапамогі праз сэрвіс “Е-дастаўка” і “прапаноўвалі напісаць яўку з павіннай”.

“У чым мая віна? Што падпісант дапамог мне з каўбасой, — цытуе “Вясна” блогера. — Яны: “Напішыце сардэчнае прызнанне, што раскайваецеся і больш не будзеце браць каўбасу ў падпісчыка”.

24 студзеня бацьку былой палітзняволенай патэлефанаваў следчы і прапанаваў выступіць сведкам па справе яго жонкі, паведамляюць праваабаронцы. Такая ж прапанова была зроблена і Вользе Такарчук. Пасля гэтага яна з дзецьмі і бацькам пакінулі Беларусь.

“У мяне засталася адна сястра ў Беларусі, у яе ёсць бабуля-інвалід (маці майго бацькі) і мая мама, якая цяпер знаходзіцца ў жодзінскай турме”, — адзначыла экс-палітвязень.

У траўні 2021 года ў кватэру, дзе Такарчук жыла з мужам і непаўналетнімі дзецьмі, прыйшлі з ператрусам. На той момант яна ўжо знаходзілася ў статусе падазраванай паводле ч. 1 арт. 391 (абраза суддзі або народнага засядацеля) і арт. 188 (паклёп) КК.

Пазней ёй прад’явілі новае абвінавачванне — паводле ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх).

У снежні 2021 года суд Заводскага раёна Мінска прыгаварыў Такарчук да 1,5 года пазбаўлення волі.

16 чэрвеня 2022 года яна выйшла на волю з гомельскай папраўчай калоніі №4, цалкам адбыўшы тэрмін пакарання.