Продажы грузавікоў МАЗ у Расіі ў студзені ўпалі на 27,8%

13 лютага, Позірк. У студзені 2024 года на расійскім рынку было прададзена 405 новых грузавікоў Мінскага аўтамабільнага завода — на 1,2% менш, чым у першым месяцы 2023-га (410) і на 27,8%, чым месяцам раней (561), гаворыцца ў даследаванні “АСМ-холдынг” (РФ).

Прадукцыя мінскага прадпрыемства ў мінулым месяцы заняла 7-е месца ў спісе самых прадаваных брэндаў гэтага сегмента аўтарынку Расіі, канстатуюць эксперты.

У пяцёрку лідараў продажаў увайшлі тры кітайскія і два расійскія вытворцы: SITRAK (1.504; +51,8% да ўзроўню продажаў у студзені 2023-га), КамАЗ (1.428; -19,4%), Shaanxi (918; -7,9 %), FAW (679; +15,9%) і ГАЗ (447; +9%).

У 2023 годзе МАЗ прадаў за год 6.406 новых грузавікоў, на 45,9% больш, чым за 2022-ы (4.391).

15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер з-за актыўнай экспансіі кітайскіх вытворцаў”.

“Гаворка не проста пра павышэнне імпартных пошлін, тут палі для манеўру амаль няма. Я маю на ўвазе антыдэмпінгавыя і спецабаронныя меры”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі “відавочная”, а дынаміка іх продажаў “палохае”.