Ціханоўская бярэ ўдзел у закрытай сустрэчы разам з віцэ-прэзідэнтам ЗША

7 траўня, Позірк. Беларускі дэмакратычны лідар Святлана Ціханоўская 7 траўня прысутнічае на закрытай сустрэчы, якая адбываецца у Вашынгтоне на форуме, арганізаваным у рамках Мюнхенскай канферэнцыі па бяспецы.

Як паведаміла прэс-служба беларускага палітыка, у сустрэчы таксама ўдзельнічае віцэ-прэзідэнт ЗША Джэй Дзі Вэнс.

Мерапрыемства ў Вашынгтоне праходзіць праз тыдзень пасля таго, як 30 красавіка ў Беларусі быў вызвалены асуджаны ў 2022 годзе да доўгага тэрміну зняволення па палітычна матываванай “справе змоўшчыкаў“ грамадзянін Беларусі і ЗША Юрый Зянковіч. Цяпер ён знаходзіцца ў Злучаных Штатах.

1 траўня прэс-сакратар Аляксандра Лукашэнкі Наталля Эйсмант заявіла, што пастанова аб вызваленні Зянковіча была прынятая “на просьбу адміністрацыі прэзідэнта ЗША”.

Ціханоўская 7 траўня завяршае тыднёвы візіт у гэтую краіну.