Кіраўнікі МЗС Германіі, Польшчы і Францыі заклікалі ЕС увесці “мэтавыя санкцыі” супраць Беларусі

13 лютага, Позірк. Міністры замежных спраў Германіі, Польшчы і Францыі ў сумеснай заяве па выніках сустрэчы ў Парыжы 12 лютага заклікалі Еўрасаюз увесці “мэтавыя санкцыі” супраць Беларусі.

Як адзначаецца на сайце МЗС Польшчы, такі крок патрэбны, каб “не дапусціць ператварэння Беларусі ў цэнтр абыходу санкцый супраць Расіі”, пры гэтым у еўрапейскай санкцыйнай палітыцы неабходна захаваць “выразную дыферэнцыяцыю ў дачыненні да агрэсара”.

Міністры пацвердзілі абавязацельствы сваіх краін “змагацца з ухіленнем ад санкцый, умацоўваць выкананне прынятых абмежавальных мер і ўводзіць далейшыя сектаральныя і індывідуальныя санкцыі, накіраваныя ў першую чаргу на абмежаванне магчымасцяў Расіі па вядзенні вайны”.

Пра ўзмацненне санкцый у дачыненні да Мінска ў кантэксце беларускага парадку дня ў заяве не гаворыцца. Беларусь у ім згадваецца яшчэ адзін раз: падкрэсліваецца неабходнасць распрацоўкі дарожнай карты, часткай якой стане ініцыятыва “Веймар культуры”, накіраваная на падтрымку дзеячаў культуры з Украіны, якія знаходзяцца ў выгнанні, а таксама Беларусі і Расіі праз спецыяльныя праграмы.

Заява кіраўнікоў знешнепалітычных ведамстваў зробленая ў рамках аб’яднання “Веймарскі трохкутнік” — трохбаковай рэгіянальнай групы для развіцця супрацоўніцтва паміж Германіяй, Польшчай і Францыяй. Група існуе ў асноўным у форме сустрэч на вышэйшым узроўні паміж лідарамі гэтых краін і іх міністрамі замежных спраў.