БСДП паведаміла пра ўвагу міліцыі да былых членаў партыі, што раней назіралі за выбарамі

16 лютага, Позірк. Міліцыя цікавіцца былымі членамі дэ-юрэ ліквідаванай Беларускай сацыял-дэмакратычнай партыі (Грамада), якія раней назіралі за выбарамі, паведамляе тэлеграм-канал БСДП.

Адзначаецца, што сілавікі праводзяць з імі гутаркі, праглядаюць тэлефоны, “некаторых затрымліваюць”.

У сувязі з гэтым партыя заявіла, што ніхто з былых членаў БСДП, якія застаюцца ў Беларусі, не будзе ўдзельнічаць у назіранні за выбарамі ў Палату прадстаўнікоў і мясцовыя саветы дэпутатаў.

“Выбараў у краіне няма, Еўрапарламент упершыню ў гісторыі не прызнаў вынікі выбараў у Беларусі яшчэ да дня галасавання. А калі выбараў няма, то што назіраць? Назіраць, на жаль, прыходзіцца імітацыю актыўных дзеянняў з боку праваахоўнікаў пад выглядам “абароны канстытуцыйнага ладу”, — гаворыцца ў звароце палітычнай сілы.

20 верасня 2023 года Вярхоўны суд задаволіў іск Міністэрства юстыцыі і ліквідаваў БСДП (Грамада). 8 студзеня 2024-га партыя была выключана з Адзінага дзяржаўнага рэгістра юрыдычных асоб і індывідуальных прадпрымальнікаў.

У 2023 годзе ў Беларусі было скасавана 12 палітычных сіл — як апазіцыйных, так і праўладных. У краіне засталося чатыры лаяльныя ўладам партыі — “Белая Русь”, Ліберальна-дэмакратычная партыя (ЛДП), Камуністычная партыя Беларусі (КПБ) і Рэспубліканская партыя працы і справядлівасці (РППС).

Сёлета ўпершыню ў Беларусі пройдуць аб’яднаныя выбары ў Палату прадстаўнікоў Нацыянальнага сходу (ПП НС) і мясцовыя саветы дэпутатаў. Адзіны дзень галасавання прызначаны на 25 лютага.

На 110 месцаў у ПП НС восьмага склікання прэтэндуе 265 кандыдатаў, на 12.512 месцаў у мясцовых саветах дэпутатаў — 18.802. Сярэдні конкурс — 2,4 і 1,5 чалавека на месца адпаведна. Сярод кандыдатаў няма праціўнікаў рэжыму Аляксандра Лукашэнкі.

Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі, у гэтым актыўна ўдзельнічае судовая сістэма.

З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.