Урад прыняў пастанову, якая рэгулюе выкарыстанне пірацкай інфармацыі

20 кастрычніка, Позірк. Урад урэгуляваў некаторыя аспекты выкарыстання пірацкай інфармацыі. Пастанова Савета міністраў № 696 “Аб выкарыстанні асобных аб’ектаў аўтарскага права і сумежных правоў” ад 18 кастрычніка афіцыйна апублікавана на Нацыянальным прававым партале.

Дакумент зацвярджае парадак фарміравання і вядзення “пераліку праваўладальнікаў аўдыёвізуальных твораў і арганізацый па калектыўным кіраванні маёмаснымі правамі” і пераліку “праваўладальнікаў перадач”. Ён таксама рэгулюе пытанне ўзнагароджання “за выкарыстанне аўдыёвізуальных твораў і перадач арганізацый вяшчання”.

Прапановы аб уключэнні праваўладальнікаў і (або) арганізацый па калектыўным кіраванні маёмаснымі правамі (АКК) у пералікі і прыкладзеныя да іх абгрунтаванні будуць рыхтавацца “арганізацыямі, якія з’яўляюцца рэдакцыямі тэлевізійных сродкаў масавай інфармацыі” і разглядацца Міністэрствам інфармацыі.

Дакумент апісвае таксама “асаблівасці фарміравання пераліку ў дачыненні да аўдыёвізуальных твораў”. Адзначаецца, што ўключэнне ў пералік будзе адбывацца на падставе наступных крытэрыяў:

— праваўладальнік з’яўляецца асобай з замежнай дзяржавы, якая здзяйсняе “недружалюбныя дзеянні”;

— праваўладальнік ці АКК забараніў ці не даў згоду (дазвол) на выкарыстанне на тэрыторыі Беларусі аўдыёвізуальнага твора, выключнае права на які належыць яму ці АКК;

— выкарыстанне аўдыёвізуальнага твора неабходна для “стварэння ўмоў для павышэння ўзроўню інфармацыйнай бяспекі, і (або) развіцця інтэлектуальнага і духоўна-маральнага патэнцыялу грамадства, і (або) забеспячэння доступу да дасягненняў сусветнай культуры і падзей сучаснага жыцця”.

Пастанова ўступае ў сілу пасля яе афіцыйнага апублікавання.

Пірацтва адносна аб’ектаў інтэлектуальнай уласнасці і “шэры” імпарт тавараў з “недружалюбных” краін у Беларусі ўведзены законам ад 3 студзеня 2023 года “Аб абмежаванні выключных правоў на аб’екты інтэлектуальнай уласнасці”.

Беларускія ўлады лічаць недружалюбнымі краіны Еўрасаюза, ЗША, Албанію, Вялікабрытанію, Ісландыю, Канаду, Ліхтэнштэйн, Нарвегію, Паўночную Македонію, Сербію, Чарнагорыю і Швейцарыю.