У санкцыйны спіс ЗША ўключаны Талай і дырэктар авіярамонтнага завода ў Баранавічах
Павел Пінігін
23 лютага, Позірк. У новы санкцыйны спіс, апублікаваны Міністэрствам фінансаў ЗША напярэдадні другой гадавіны пачатку вайны ва Украіне, трапіла беларуская кампанія і дзве фізічныя асобы.
У спіс уключаны 558-ы Авіяцыйны рамонтны завод у Баранавічах, яго дырэктар Павел Пінігін, а таксама паралімпіец Аляксей Талай.
Санкцыі таксама ўведзены супраць амбасадара Расіі ў Беларусі Барыса Грызлова і былога пасла РФ у Беларусі, дзяржсакратара Саюзнай дзяржавы Дзмітрыя Мезенцава.
Акрамя таго, у санкцыйны спіс увайшла расійская нацыянальная сістэма плацежных карт (аператар сістэмы “Мір”).
З 1 студзеня 2022 года “ў сувязі з завяршэннем праекта па міжсістэмнай інтэграцыі плацежнай сістэмы “Белкарт” і плацежнай сістэмы “Мір” для банкаў — удзельнікаў плацежнай сістэмы “Белкарт” устанаўліваецца патрабаванне аб прыёме да абслугоўвання банкаўскіх плацежных картак плацежнай сістэмы “Мір” ва ўсіх плацежных тэрміналах у арганізацыях гандлю (сэрвісу), плацежных тэрміналах у пунктах выдачы наяўных грашовых сродкаў, банкаматах і зноў усталёўваных плацежных тэрміналах самаабслугоўвання”, паведамляў Нацбанк.
Як паведамлялася, у зацверджаны Еўрапейскім саюзам 23 лютага 13-ы пакет санкцый супраць РФ, прымеркаваны да другой гадавіне ўварвання ва Украіну, таксама ўключылі паралімпійца Талая і яго фонд. Ён названы “адной з ключавых асоб, якія маюць дачыненне да гвалтоўнай дэпартацыі ўкраінскіх дзяцей у Беларусь і іх наступнага незаконнага ўсынаўлення расійскімі і беларускімі сем’ямі”.
24 лютага Расія пачала поўнамаштабную вайну супраць Украіны. Улады ў Мінску адмаўляюць удзел беларускай арміі ў баявых дзеяннях на баку РФ, у той жа час тэрыторыя Беларусі з пачатку ўварвання, а таксама ў асобныя перыяды пазней, актыўна выкарыстоўвалася расійскай арміяй для нанясення ўдараў па Украіне.
У жніўні 2022 года Галоўнае ўпраўленне разведкі Міністэрства абароны (ГУР МА) Украіны паведамляла, што беларускае ваеннае ведамства падпісала з урадам Расіі “тэрміновыя кантракты на рамонтна-аднаўленчыя работы авіяцыйнай тэхнікі”. Паводле інфармацыі ГУР, работнікі 558-га авіяцыйнага рамонтнага завода “перыядычна ажыццяўляюць камандзіроўкі ў складзе “выязных груп” для правядзення работ па аднаўленні і ўводзе ў эксплуатацыю авіяцыйнай тэхнікі на 121-м авіяцыйным рамонтным заводзе (тэрыторыя авіябазы Кубінка, у Маскоўскай вобласці)”.