У Беларусі прагназуюць замаразкі, МНС папярэджвае пра магчымую гібель сельскагаспадарчых культур

10 траўня, Позірк. Аранжавы ўзровень небяспекі — трэці з чатырох — абвешчаны ў Беларусі на 11 траўня праз замаразкі.

Міністэрства па надзвычайных сітуацыях са спасылкай на Белгідрамет паведаміла, што гэтай ноччу ў Мінску чакаецца да 2 градусаў марозу, у Гомельскай вобласці — да 4 градусаў марозу, Брэсцкай, Віцебскай, Гродзенскай, Мінскай, Магілёўскай — да 5 градусаў марозу.

Паніжэнне тэмпературы, папярэджвае МНС, можа прывесці да пашкоджання і гібелі сельскагаспадарчых раслін.

Жыхарам краіны рэкамендавана накрыць расліны плёнкай або спанбондам, а таксама не пакідаць без накрыцця на палях бульбу і карняплоды.

Раней “Позірк” паведамляў, што ад пачатку траўня на беларускіх метэастанцыях зарэгістравана больш за 50 рэкордаў холаду.