Латушка: Беларусь зноў спрабуюць аддаць пад чужы кантроль
Павел Латушка
25 жніўня, Позірк. Абсалютная большасць беларусаў “цвёрда імкнецца жыць у суверэннай дзяржаве”, гаворыцца ў заяве намесніка кіраўніка Аб’яднанага пераходнага кабінета Паўла Латушкі з нагоды 35-й гадавіны надання Дэкларацыі аб дзяржаўным суверэнітэце Беларусі статусу канстытуцыйнага закона.
На яго думку, паведамляе прэс-служба АПК, “25 жніўня 1991 года — вызначальная дата для сучаснай беларускай дзяржавы”.
“Стагоддзі барацьбы нашых продкаў за незалежнасць нарэшце завяршыліся перамогай, і суверэнная Беларусь заняла сваё месца на карце Еўропы, — адзначыў палітык. — Беларусы нарэшце набылі свой уласны дом. Дом, у якім ніхто больш не меў бы права прыгнятаць нас, вызначаць наш шлях, навязваць нам чужых саюзнікаў або забараняць размаўляць на роднай мове. Сёння наш сумесны дом захоплены ворагам Беларусі”.
Аляксандр Лукашэнка “ператварыў незалежнасць у банальны прадмет гандлю, каб проста ўтрымаць асабістую ўладу”, дадаў экс-дыпламат: “Нашу краіну зноў спрабуюць аддаць пад чужы кантроль, а беларусаў — пазбавіць права на ўласную будучыню. Наша галоўная сумесная задача — не дапусціць гэтага злачынства супраць народа”.
У сваім віншаванні спікер Каардынацыйнай рады Арцём Брухан зычыў “сапраўднай незалежнасці для <…> Радзімы“.
“Сёння для абсалютнай большасці беларусаў незалежнасць — гэта галоўная каштоўнасць. Беларусы не хочуць быць часткай Расіі, яны хочуць жыць у сапраўды незалежнай краіне, якая не ўдзельнічае ў агрэсіі супраць суседзяў”, — падкрэсліў ён.
“Нам не трэба даказваць камусьці, што мы маем права на сваю дзяржаву. Бо кожнае пакаленне рабіла ўсё магчымае, каб Беларусь існавала на палітычнай карце свету”, — рэзюмаваў палітык.
25 жніўня 1991 года Вярхоўны Савет БССР надаў Дэкларацыі аб дзяржаўным суверэнітэце (прынята 27 ліпеня 1990-га) статус канстытуцыйнага закона. 19 верасня таго ж года БССР атрымала назву Рэспубліка Беларусь.
Група дэпутатаў Вярхоўнай Рады: Лёс незалежнай Беларусі вырашаецца таксама на фронце ва Украіне
25 жніўня, Позірк. Пра сувязь лёсу незалежнай беларускай дзяржавы з вынікам вайны Расіі супраць Украіны гаворыцца ў звароце міжфракцыйнай групы Вярхоўнай Рады "За дэмакратычную Беларусь" з нагоды 35-й гадавіны надання Дэкларацыі аб дзяржаўным суверэнітэце Беларусі статусу канстытуцыйнага закона. У дакуменце …
Ціханоўская: Пра сваю дзяржаву марылі многія пакаленні беларусаў — толькі нашаму пашанцавала
25 жніўня, Позірк. "Пра сваю дзяржаву марылі многія пакаленні беларусаў, за яе змагаліся, сядзелі ў турмах і жылі ў выгнанні. І толькі нашаму пакаленню пашанцавала жыць у сваёй незалежнай краіне", — адзначыла дэмакратычны лідар Святлана Ціханоўская ў звароце з нагоды …
