Жыхар Івацэвіцкага раёна затрыманы за стральбу з пнеўматыкі ў веласіпедыста

25 жніўня, Позірк. Пра затрыманне 21-гадовага жыхара Івацэвіцкага раёна (Брэсцкая вобласць) за стральбу з пнеўматыкі ў незнаёмага 53-гадовага мужчыну паведамляе Генеральная пракуратура.

Малады чалавек “у адзін з дзён жніўня 2026 года рухаўся за рулём легкавога аўтамабіля па аўтадарозе Р-6 Івацэвічы — Пінск — Столін каля в. Краглевічы” ў тым жа раёне. Ён апусціў шкло з пасажырскага боку аўтамабіля і “не менш як тры разы стрэлілі з пнеўматычнага пісталета па незнаёмаму мужчыну, які праязджаў на ровары”.

Пацярпелы звярнуўся ў органы ўнутраных спраў, якія ўстанавілі страляючага. Той растлумачыў, што набыў пнеўматычны пісталет і камплектуючыя да яго ў адной з інтэрнэт-крам, а “па незнаёмаму яму мужчыну страляў дзеля забавы”.

Падчас агляду па месцы жыхарства фігуранта праваахоўнікамі знойдзены і канфіскаваны пнеўматычны пісталет, сем металічных балонаў, пластыкавы слоік з металічнымі шарыкамі.

Страляламу прад’яўлена абвінавачанне ў злосным хуліганстве (ч. 2 арт. 339 КК; караецца арыштам, абмежаваннем волі на тэрмін да трох гадоў або пазбаўленнем волі на тэрмін ад аднаго да шасці гадоў).