Міністр абароны Літвы: Беларусь загадзя папярэдзіла пра набліжэнне беспілотнікаў і спробы іх нейтралізаваць

11 лістапада, Позірк. Беларускія вайскоўцы ўвечары 10 лістапада папярэдзілі літоўскі бок аб набліжэнні неапазнаных паветраных аб’ектаў, якія спрабавалі нейтралізаваць. Пра гэта заявіў міністр абароны Літвы Робертас Каўнас, паведамляе літоўскі сайт 15 min са спасылкай на BNS.

“У 22:47 па тэхнічным канале была атрыманая інфармацыя ад беларускага боку аб тым, што ў напрамку Літвы ляцяць неапазнаныя аб’екты, якія Беларусь спрабуе нейтралізаваць“, — паведаміў Каўнас у эфіры LRT.

Ён адзначыў, што падобны абмен інфармацыяй перыядычна адбываецца па каналах сувязі паміж ваенна-паветранымі сіламі.

Пасля выяўлення паветраных аб’ектаў літоўскімі радыёлакацыйнымі сістэмамі ў Віленскім і Уцянскім паветах быў абвешчаны жоўты ўзровень паветранай пагрозы. Аднак гэтыя аб’екты не перасеклі мяжу Літвы, змяніўшы кірунак у бок Латвіі і меркавана Расіі.

Пасля паўночы быў зафіксаваны іншы паветраны аб’ект. Паводле папярэдняй інфармацыі, беспілотнік заляцеў у Літву з боку Беларусі ў раёне Друскінінкая, затым ненадоўга апынуўся ў паветранай прасторы Польшчы, вярнуўся ў Літву і працягнуў палёт у кірунку Латвіі.

Каўнас выказаў здагадку, што беспілотнікі маглі належаць Украіне і накіроўвацца для нанясення ўдараў па расійскім порце Усць-Луга і іншых аб’ектах на тэрыторыі Расіі, аднак адхіліліся ад курсу.

Раней 11 лістапада “Позірк” паведамляў, што ў сувязі з выяўленнем паветраных аб’ектаў у Літве і Латвіі абвяшчалася трывога, а аэрапорты Вільнюса і Каўнаса часова прыпынялі працу.

Пасля прэм’ер-міністр Літвы Міндаўгас Сінкявічус заявіў аб выяўленні ў раёне Біржая абломкаў ракеты, меркавана выпушчанай знішчальнікам НАТО пры спробе знішчыць адзін з беспілотнікаў.