Беларусь і Кыргызстан маюць намер павялічыць тавараабарот да 500 млн долараў да 2030 года — СМІ

11 лістапада, Позірк. Павялічыць узаемны тавараабарот да 500 млн долараў да 2030 года маюць намер Беларусь і Кыргызстан, паведамляе агенцтва “Кабар“ са спасылкай на ўрад Кыргызстана.

Гэты паказчык прадугледжаны дарожнай картай развіцця гандлёва-эканамічнага супрацоўніцтва дзвюх краін да 2030 года. Аб яе рэалізацыі ішла размова на 13-м пасяджэнні міжурадавай камісіі, якое адбылося 10 лістапада ў Мінску.

Паводле звестак Нацыянальнага статыстычнага камітэта Кыргызстана, у 2025 годзе тавараабарот з Беларуссю склаў 270,5 млн долараў супраць 133,8 млн у 2024-м (рост у 2,02 раза). У 2021 годзе аб’ём узаемнага гандлю складаў 74 млн долараў. Такім чынам, за чатыры гады паказчык павялічыўся ў 3,7 раза.

Пасяджэнне камісіі прайшло пад сустаршынствам намесніка кіраўніка Кабінета міністраў Кыргызстана, міністра водных рэсурсаў, сельскай гаспадаркі і перапрацоўчай прамысловасці Эрліста Акунбекава і намесніка прэм’ер-міністра Беларусі Аляксандра Церахава.

На сустрэчы абмяркоўвалася супрацоўніцтва ў прамысловасці, будаўніцтве, транспарце, сельскай гаспадарцы, аграпрамысловым комплексе і ахове здароўя.

Акунбекаў заявіў аб зацікаўленасці Кыргызстана ў сумесных праектах у аўтамабілебудаванні, машынабудаванні, станкабудаванні, лёгкай прамысловасці і фармацэўтыцы. Ён таксама прапанаваў разгледзець магчымасць супрацоўніцтва паміж беларускім банкам развіцця і Дзяржаўным банкам развіцця Кыргызстана для фінансавання сумесных праектаў.

Па выніках пасяджэння падпісаныя пагадненне аб супрацоўніцтве паміж Мінскім аўтамабільным заводам і Кыргызскай кампаніяй “Аўтамаш-радыятар“, дагавор аб пастаўках тэхнікі паміж “Гомсельмашам“ і той жа кампаніяй.

На сайце амбасады Беларусі ў Кыргызстане адзначаецца, што “аб’ём узаемнага гандлю бакоў устойліва расце ўжо на працягу шасці гадоў”, “прыярытэтамі гандлёва-эканамічнага супрацоўніцтва з’яўляюцца пастаўкі сельскагаспадарчай і камунальнай тэхнікі, мясамалочнай прадукцыі“. Іншых звестак аб двухбаковым гандлі замежная ўстанова не публікуе. У 2022 годзе Белстат засакрэціў краінавую статыстыку знешняга гандлю.