Лукашэнка хоча большага палітычнага і эканамічнага супрацоўніцтва з Дамініканай

27 лютага, Позірк. Беларусь зацікаўленая ў “развіцці палітычнага дыялога” з Дамініканскай Рэспублікай “на прынцыпах узаемнай павагі і даверу”, адзначыў Аляксандр Лукашэнка, віншуючы 27 лютага прэзідэнта Луіса Радольфа Абінадэра Карону і народ гэтай краіны Карыбскага басейна са 180-й гадавінай незалежнасці.

У пасланні, апублікаваным прэс-службай віншавальніка, таксама гаворыцца пра зацікаўленасць Мінска ў “пашырэнні ўзаемадзеяння ў міжнародных арганізацыях” і “больш поўнай рэалізацыі патэнцыялу гандлёва-эканамічнага супрацоўніцтва”.

На думку Лукашэнкі, Дамініканская Рэспубліка падышла да чарговай гадавіны незалежнасці “з сур’ёзнымі дасягненнямі ў эканоміцы і сацыяльнай сферы, відавочным для кожнага грамадзяніна паляпшэннем якасці жыцця”.

У верасні 2023 года Лукашэнка сваім указам ухваліў у якасці асновы для правядзення перамоваў праект міжурадавага пагаднення з Дамініканскай Рэспублікай аб узаемным скасаванні віз. Правесці адпаведныя перагаворы даручана Міністэрству замежных спраў.

Дыпламатычныя стасункі паміж Мінскам і Санта-Дамінга ўсталяваныя 18 красавіка 2001 года.

За прадстаўленне інтарэсаў Беларусі ў Дамінікане адказвае амбасада ў Рэспубліцы Куба. Паводле інфармацыі на сайце дыпламатычнай місіі, “структура беларускага экспарту ў Дамініканскую Рэспубліку нязначная і фармуецца за кошт трактароў, аўтамабільнай тэхнікі, запасных частак і шын”. У зваротным кірунку ідуць “моцныя спіртныя напоі, кава, садавіна, раслінныя тлушчы і алеі”.

У 2021 годзе тавараабарот складаў каля 8,5 млн долараў, з якіх прыкладна 7,5 млн прыпадала на беларускія пастаўкі. Актуальных даных па ўзаемным гандлі ў адкрытым доступе няма.