Пазіцыя МЗС з’яўляецца верхам цынізму, абвінавачанні ЕС не ўзніклі з вакууму — Гарбунова

28 лютага, Позірк. Пазіцыя беларускага МЗС, якое заявіла аб “галаслоўных абвінавачваннях ЕС у нейкім спецыяльным рэжыме адбывання пакаранняў для асобных грамадзян Беларусі, лёсы якіх прыцягваюць асаблівую ўвагу ў заходніх палітычных колах толькі з прычыны іх палітычных прыхільнасцяў”, з’яўляецца “верхам цынізму”, адзначыла ў каментары “Позірку” прадстаўніца па сацыяльнай палітыцы Аб’яднанага пераходнага кабінета (АПК) Вольга Гарбунова.

Прэтэнзіі “не ўзніклі з вакууму, за імі стаіць пастаянная праца праваабарончых арганізацый, палітычных структур, розных актывістаў, якія выйшлі палітвязняў, якіх ужо на дадзены момант больш за паўтары тысячы”, сказала яна.

Няма ніводнага сведчання былых палітвязняў аб тым, што ў месцах пазбаўлення волі для іх былі створаны больш-менш разумныя, нармальныя, адэкватныя ўмовы. Усе сведчанні відавочцаў гавораць аб гвалце, аб катаваннях”, падкрэсліла Гарбунова.

Такім чынам, гаворка варта весці не пра “галаслоўныя абвінавачанні ЕС”, а пра “абвінавачанні [з боку] беларусаў, якія дакументуюць кейсы па катаваннях, збіраюць доказы для ўзбуджэння крымінальных спраў у краінах іх цяперашняга знаходжання. Доказы ўчыненых злачынстваў “відавочныя”, адзначыла прадстаўніца АПК.

На яе думку, прадузятыя адносіны да палітвязняў пачынаюцца з ізалятараў часовага ўтрымання і цэнтраў ізаляцыі правапарушальнікаў, дзе іх пазбаўляюць элементарных бытавых рэчаў (матрацаў, верхняй вопраткі, прадметаў гігіены) і працягваецца ў следчых ізалятарах (жоўтыя біркі на вопратцы, “прафілактычны ўлік” асоб, схільных да экстрэмісцкай і дэструктыўнай дзейнасці).

28 лютага МЗС Беларусі распаўсюдзіў каментар, у якім абвяргае “галаслоўныя абвінавачанні ЕС у нейкім спецыяльным рэжыме адбывання пакаранняў для асобных грамадзян Беларусі, лёсы якіх прыцягваюць асаблівую ўвагу ў заходніх палітычных колах толькі з прычыны іх палітычных прыхільнасцяў”.

Заяўляецца, што “ў дачыненні да ўсіх грамадзян Рэспублікі Беларусь, якія адбываюць пакаранні за ўчыненыя крымінальныя злачынствы, як і ў любой краіне ЕС, прымяняюцца без якой-небудзь дыскрымінацыі патрабаванні адпаведных законаў аб рэжымах выканання пакаранняў”.

Ведамства сцвярджае, што “ўсе зняволеныя атрымліваюць неабходнае медыцынскае і іншае садзейнічанне ў парадку і аб’ёмах, вызначаных законам”.