Памежныя службы Беларусі і Літвы фіксуюць рост колькасці фур на двух апошніх пунктах пропуску

2 сакавіка, Позірк. Закрыццё Літвой памежных пераходаў Лаварышкес (з беларускага боку — Катлоўка) і Райгардас (Прывалка) прывяло да павелічэння колькасці фур на двух апошніх пунктах пропуску — Мядзінінкай (Каменны Лог) і Шальчынінкай (Беняконі), заяўляе Дзяржаўны пагранічны камітэт.

“Гэтае рашэнне справакавала рост чэргаў грузавога транспарту ў Літву на 57% у параўнанні з паказчыкамі тыднёвай даўніны”, — адзначае ведамства.

Дзяржпагранкамітэт таксама сцвярджае, што гэтым крокам Вільнюс стварыў “чарговыя перашкоды” для ўласных грамадзян, якія жадаюць “скарыстацца папулярным беларускім бязвізам”. “Варта адзначыць, што з пачатку дзеяння бязвізавага рэжыму нашу краіну наведалі ўжо каля 520 тысяч літоўцаў”, — гаворыцца ў паведамленні.

Прэс-сакратар Службы аховы дзяржаўнай мяжы (САДМ) Літвы Гедрус Мішуціс паведаміў, што на раніцу 2 сакавіка ў пункце Мядзінінкай з літоўскага боку ў чарзе стаяла каля 500 цягачоў, Шальчынінкай — каля 300.

“У Мядзінінкай маецца пляцоўка на 350 месцаў, яна запоўнена, — цытуе прадстаўніка ведамства партал навін Delfi. — Каля яе ў чарзе стаяць яшчэ 145 цягачоў. Апошняму з іх давядзецца чакаць 55 гадзін. <…> Зараз у Шальчынінкай стаяць 340 цягачоў. Пляцоўка чакання таксама запоўненая, яшчэ столькі ж, колькі на ёй, машын стаіць у чарзе. Тут час чакання складае каля 34 гадзін”.

На беларускім баку, сказаў ён, чэргі яшчэ большыя: у пункце Каменны Лог 680 фур, Беняконі — “падобная колькасць”.

Мішуціс паведаміў, што кіроўцам легкавых аўтамабіляў у пункце Мядзінінкай давядзецца стаяць у чарзе 6 гадзін, Шальчынінкай — 2 гадзіны.

1 сакавіка Літва закрыла пункты пропуску Лаварышкес і Райгардас і забараніла рух пешаходаў і раварыстаў праз Мядзінінкай і Шальчынінкай. Акрамя таго, на 50% скарочана колькасць дазволаў на пасажырскія перавозкі праз гэтыя пункты.

У жніўні 2023 года Вільнюс закрыў памежныя пераходы — Шумскас (Лоша) і Цвярачус (Відзы).

Літоўскія ўлады заяўляюць, што меры скіраваныя на вырашэнне праблем нацыянальнай бяспекі, кантрабанды і парушэння міжнародных санкцый.