“Вясна”: З восені 2020 года паводле палітычна матываваных крымінальных абвінавачанняў асуджана 4.690 чалавек

4 сакавіка, Позірк. З восені 2020 года ў Беларусі паводле палітычна матываваных крымінальных абвінавачанняў асуджана 4.690 чалавек, гаворыцца ў аглядзе праваабарончага цэнтра “Вясна” сітуацыі з правамі чалавека за люты.

На канец мінулага месяца ў Беларусі налічвалася 1.410 палітычных зняволеных (на 4 сакавіка — 1.405), сярод якіх 170 жанчын. Не менш за 1.560 палітвязняў (361 жанчына) адбылі тэрмін і выйшлі на волю, былі прыгавораныя да пакарання, не звязанага з пазбаўленнем волі, падпалі пад змену меры стрымання, амністыю ці памілаванне. Такім чынам, сумарная колькасць былых і актуальных палітвязняў “няўхільна расце”, іх агульная колькасць наблізілася да 3.000 (больш за 530 жанчын), адзначае “Вясна”.

Праваабаронцы нагадалі, што 20 лютага памёр палітвязень, былы актывіст Беларускай сацыял-дэмакратычнай партыі (Грамада) Ігар Леднік, прыгавораны да 3 год пазбаўлення волі паводле арт. 367 (паклёп на прэзідэнта) за публікацыю ў партыйным часопісе “Пазіцыя”. Ён стаў сама меней пятым палітвязнем, які памёр падчас адбыцця пакарання. Праваабарончая супольнасць запатрабавала правесці расследаванне для высвятлення прычын яго смерці.

У краіне “працягваюцца адвольныя рэпрэсіі ў дачыненні да беларусаў за рэалізацыю сваіх грамадзянскіх правоў”, канстатавала “Вясна”. За люты, паводле інфармацыі праваабаронцаў, зафіксавана не менш за 625 фактаў рэпрэсій (суды і затрыманні), звязаных з крымінальным і адміністрацыйным пераследам, мінімум 548 выпадкаў палітычна матываванага адміністрацыйнага разбіральніцтва ў судзе. Суддзі прызначылі сама меней 95 адміністрацыйных арыштаў, 84 штрафы, тройчы — грамадскія працы. Акрамя таго, больш за 100 чалавек — палітвязняў і іх блізкіх — асуджаныя ў адміністрацыйным парадку за атрыманне прадуктовай дапамогі.

Праваабаронцы “Вясны” па-ранейшаму рэгулярна выяўляюць і дакументуюць факты прымянення катаванняў і забароненых відаў абыходжання падчас расследавання палітычна матываваных крымінальных справаў, а таксама забароненых відаў абыходжання ў адміністрацыйным працэсе.

З 2023 года па-ранейшаму няма звестак пра лёс шэрагу палітвязняў: Марыі Калеснікавай (з 15 лютага), Мікалая Статкевіча (а з 10 лютага), Сяргея Ціханоўскага (з 9 сакавіка), Ігара Лосіка (з 20 лютага), Віктара Бабарыкі.

Доўгі час няма лістоў ад лаўрэата Нобелеўскай прэміі міру Алеся Бяляцкага, які знаходзіцца ў памяшканні камернага тыпу (ПКТ) калоніі № 9 у Горках (Магілёўская вобласць). З заснавальнікам і старшынёй “Вясны” не сустракаецца адвакат, праваабаронца пазбаўлены тэлефонных перамоваў з роднымі, а таксама магчымасці атрымліваць перадачы і лекі.

У дакуменце таксама адзначана, што праведзеныя ў адзіны дзень галасавання 25 лютага выбары дэпутатаў Палаты прадстаўнікоў Народнага сходу і мясцовых саветаў дэпутатаў “не адпавядалі міжнародным стандартам правядзення дэмакратычных і свабодных выбараў, а таксама суправаджаліся шматлікімі парушэннямі выбарчага заканадаўства Беларусі”.

Сітуацыя з правамі чалавека ў Беларусі “па-ранейшаму застаецца крытычнай”; “працягваюцца рэпрэсіі ў дачыненні да палітычных праціўнікаў рэжыму і іншадумцаў”; на гэтым фоне ўлады “дэманструюць ілюзію грамадзянскай згоды” і “ўсенароднай падтрымкі” палітыкі, якая праводзіцца, адзначае “Вясна”.