Ягораў: Каардынацыйная рада  не можа аб’явіць аб самароспуску

4 сакавіка, Позірк. Каардынацыйная рада (КР) прыняла рашэнне, што выбары ў трэці склад адбудуцца 25 траўня, і цяпер неабходна “давесці справу па арганізацыі выбараў да канца”, заявіў 4 сакавіка спікер палітычнай структуры Андрэй Ягораў.

У відэазвароце, апублікаваным у тэлеграм-канале КР, палітык падкрэсліў, што “асноўная адказнасць” рады — “працяг працы самой інстытуцыі”. “Таму Каардынацыйная рада не можа абвясціць аб самароспуску і пакінуць пытанне арганізацыі выбараў на каго-небудзь іншага”, — дадаў Ягораў.

19 лютага стала вядома, што дэмакратычныя сілы дамовіліся аб працэдуры выбараў у новы склад КР. “Рабочая група па выбарах, [складзеная з прадстаўнікоў] офіса Святланы Ціханоўскай, Аб’яднанага пераходнага кабінета і партый, дасягнула кансенсусу”, — гаварылася ў паведамленні.

Удакладнялася, што па выніках пасяджэння фінальны варыянт праекта будзе накіраваны Ціханоўскай.

“Варыянт, які прапануе рабочая група, прадугледжвае толькі адзін голас у выбаршчыка, а пасля выбараў у КР будзе створаная кансультатыўная грамадская палата для няўрадавых арганізацый”, — адзначыла КР.

29 лютага Ціханоўская падтрымала накіраванае ёй на зацвярджэнне кампраміснае ўзгодненае рашэнне аб працэдуры выбараў у КР. Адначасова яна прапанавала распрацаваць і ўзгадніць у бліжэйшы час палажэнне аб выбарах, а таксама “рэалістычны план” іх правядзення.

На 25 траўня выбары ў новы склад КР былі прызначаныя 9 лютага. Раней структура заяўляла, што выбары будуць прамымі, “з закрытымі спісамі і бачнымі кандыдатамі”.

7 лютага КР падоўжыла мандат дзеючага складу, які мінаў 8-га, да першага агульнага сходу новага складу. На гэтым фоне склала свае паўнамоцтвы віцэ-спікера і выйшла з КР Алена Жываглод.

Каманда Народнага антыкрызіснага ўпраўлення адклікала свайго дэлегата Арцёма Брухана “ў сувязі з завяршэннем паўнамоцтваў другога склікання Каардынацыйнай рады”. НАУ выступіла за правядзенне выбараў у КР па сістэме прамога галасавання, дзе ў кожнага выбаршчыка ёсць адзін голас.

У канцы снежня мінулага года дзевяць членаў КР запатрабавалі распусціць цяперашні склад.

28 лістапада 2023 года сілавікі правялі ў Беларусі больш за 130 ператрусаў у рамках крымінальнай справы, звязанай з дзейнасцю КР, вынесена 145 пастаноў аб арышце маёмасці.

Следчы камітэт паведаміў, што падазраванымі па справе праходзіць больш за 100 чалавек. Ім інкрымінуюцца ч. 1 арт. 357 (змова ці іншыя дзеянні з мэтай захопу дзяржаўнай улады) і ч. 3 арт. 361¹ (стварэнне экстрэмісцкага фарміравання альбо ўдзел у ім) Крымінальнага кодэкса.