Касцёл у Беларусі заклікаў 27 кастрычніка далучыцца да малітвы за мір

22 кастрычніка, Позірк. Зрабіць 27 кастрычніка днём посту, пакаяння і малітвы за мір заклікала ўсіх “вернікаў краіны, кожнага чалавека добрай волі” Канферэнцыя каталіцкіх біскупаў Беларусі (ККББ).

У сваім звароце, апублікаваным на каталіцкім партале catholic.by, ККББ просіць “кожнага пробашча ў Беларусі”, па магчымасці, правесці ў 19:00 адмысловае набажэнста аб міры.

Такім чынам беларускае каталіцкае біскупства падтрымала прапанову папы рымскага Францішка правесці агульную малітву ў святле шматлікіх ваенных канфліктаў у свеце.

“У свеце адкрыта шмат франтоў вайны, — сказаў пантыфік на генеральнай аўдыенцыі 18 кастрычніка. — Няхай змоўкне зброя, няхай будзе пачуты крык бедных і дзяцей аб міры. Вайна не вырашыць ніводнай праблемы. Яна сее толькі смерць і разбурэнне. Яна павялічвае нянавісць. Яна памнажае помсту. <…> Заахвочваю вернікаў стаць на адзін бок у гэтым канфлікце — бок міру, — не толькі словамі, але малітвай”.

Францішак заклікаў далучыцца да малітвы 27 кастрычніка людзей розных хрысціянскіх канфесій, іншых рэлігій і “ўсіх, хто імкнецца да справы міру ў свеце”.

У базыліцы святога Пятра ў Ватыкане ў гэты дзень “малітва ў духу пакаяння” з просьбай “аб міры ў гэтым свеце” пройдзе ў 18:00 (паводле мінскага часу — 19:00).