6 сакавіка, Позірк. План ваеннага ўмацавання і супрацьдзеяння прасоўванню варожых войскаў на ўсходняй мяжы зацвердзіў 5 сакавіка Кабінет міністраў Латвіі, паведамляе прэс-служба Міністэрства нацыянальнай абароны гэтай балтыйскай краіны.
Адзначаецца, што гэты план з’яўляецца часткай фармаванай дзяржавамі рэгіёну Балтыйскай лініі абароны, які ўключае ў сябе “стварэнне апорных пунктаў для падраздзяленняў нацыянальных узброеных сіл уздоўж усёй расійска-беларускай мяжы — абарончых пазіцый і ўмацаванняў для салдат, розных перашкод, супрацьтанкавых равоў, складоў боепрыпасаў і мін”.
Практычнае ўмацаванне ўсходняй мяжы пачнецца ў сакавіку. На працягу наступных пяці гадоў у гэтую справу будзе ўкладзена 303 млн еўра.
“Каб прадухіліць перамяшчэнне праціўніка, умацаванне мяжы ў Латвіі пачнецца з перакопкі існых дарог для стварэння супрацьтанкавых равоў, пазней у такія равы таксама будуць пераўтвораныя дрэнажныя каналы ўздоўж мяжы, — гаворыцца ў паведамленні абароннага ведамства. — Будуць усталяваныя розныя тыпы загарод — супрацьтанкавыя равы ўмацуюць бетоннымі блокамі і так званымі “зубамі дракона”, супрацьтанкавымі мінамі. Перашкоды будуць усталяваныя з улікам мясцовасці, з выкарыстаннем натуральных бар’ераў — балот, лясоў, іншых прыродных аб’ектаў”.
“У прыгранічнай зоне будуць вызначаныя месцы і створаныя надзейныя сховішчы выбухоўкі, мін і інжынерных матэрыялаў для хуткага ўмацавання абарончых пазіцый. Акрамя таго, будуць распрацаваныя планы падрыхтоўкі найважнейшых транспартных артэрый — аўтамабільных дарог і чыгунак, мастоў — для хуткай і эфектыўнай перашкоды, каб затрымаць магчымае прасоўванне праціўніка”, — падкрэслівае Мінабароны Латвіі.
Міністры абароны Літвы, Латвіі і Эстоніі падпісалі пагадненне аб фармаванні Балтыйскай лініі абароны ў студзені 2024 года.
