Дзяржпагранкамітэт: Больш за 2,4 тыс. фур чакаюць чаргі на выезд у ЕС

6 сакавіка, Позірк. У чарзе на мяжы Беларусі з краінамі Еўрасаюза на 10:00 6 сакавіка знаходзілася 2.430 вялікагрузных аўтамабіляў, паведамляе Дзяржаўны пагранічны камітэт.

Найбольшая колькасць фур сабралася на выездзе ў бок Літвы: перад пунктам пропуску Каменны Лог (з другога боку Мядзінінкай) — 850, перад пунктам Беняконі (Шальчынінкай) — 815. Паводле даных Дзяржпагранкамітэта, прапускная здольнасць першага складае 500 фур на суткі, другога — 250.

Выезду ў Латвію ў адзіным дзеючым пункце пропуску Грыгораўшчына (Патэрніекі) чакае 465 грузавікоў (200 за суткі).

На польскім напрамку ў чарзе ў пункце Казловічы (Кукурыкі) стаяла 300 фур (1.200).

18 жніўня 2023 года Літва закрыла пункты пропуску Шумскас (з беларускага боку — Лоша) і Цвярачус (Відзы), 1 сакавіка 2024-га Лаварышкес (Катлоўка) і Райгардас (Прывалка). На мяжы з Беларуссю працягваюць працаваць два пагранпераходы — Мядзінінкай і Шальчынінкай.

Пасля вынясення палітычна матываванага прыгавору журналісту, актывісту неафіцыйнага Саюза палякаў Беларусі Анджэю Пачобуту (8 гадоў пазбаўлення волі) 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).

19 верасня 2023 года праз узрослую плынь нелегальных мігрантаў з боку Беларусі Латвія на нявызначаны тэрмін закрыла і забарыкадавала пункт пропуску Сілене (Урбаны).