У студзені і лютым фізасобы прадалі наяўнай валюты на 371,3 млн долараў больш, чым купілі

7 сакавіка, Позірк. У студзені — лютым насельніцтва Беларусі выступіла чыстым прадаўцом замежнай валюты, сведчаць звесткі Нацыянальнага банка.

Фізічныя асобы набылі замежнай валюты на 1 млрд 658,1 млн долараў (тут і далей у эквіваленце), прадалі на 1 млрд 812,2 млн. Адмоўнае сальда склала 154,1 млн.

Наяўнай валюты набыта на 1 млрд 53,6 млн, прададзена на 1 млрд 424,9 млн (-371,3 млн), безнаяўнай — 604,5 млн і 387,2 млн (+217,3 млн).

У студзені фізічныя асобы набылі замежнай валюты на 905 млн долараў, прадалі на 891 млн (+14 млн): наяўнай валюты набыта на 564,2 млн, прададзена на 702,4 млн (-138,2 млн), безнаяўнай — 340,8 млн і 188,6 млн (+152,1 млн).

У 2023 годзе насельніцтва набыло наяўнай валюты на 6 млрд 31,7 млн долараў, прадало — на 7 млрд 904,7 млн. Безнаяўнай валюты жыхары краіны купілі на 3 млрд 904,7 млн, рэалізавалі — на 2 млрд 213,3 млн. Усяго наяўнай і безнаяўнай валюты за год яны набылі на 9 млрд 825,7, прадалі — на 10 млрд 117,9 млн. Склалася адмоўнае сальда на ўзроўні 292,2 млн.

Паводле звестак Нацбанка, міжнародныя рэзервовыя актывы Беларусі на 1 сакавіка паводле папярэдніх звестак склалі 8 млрд 218,6 млн долараў, павялічыўшыся за месяц на 125,1 млн долараў (1,5%). Рост ЗВР у лютым адбыўся за кошт папаўнення рэзерваў у замежнай валюце, якія за месяц павялічыліся на 146,2 млн (3 млрд 296,6 млн).