Пуцін цалкам кіруе сілавым блокам і войскамі ў Беларусі — Зяленскі

8 сакавіка, Позірк. “Сілавым блокам і войскамі на тэрыторыі Беларусі цалкам кіруе” прэзідэнт Расіі Уладзімір Пуцін, заявіў прэзідэнт Украіны Уладзімір Зяленскі ў эфіры праграмы Cinque minuti на італьянскім тэлеканале Rai.

Інтэрв’ю 8 сакавіка было апублікаванае ў ютуб-канале офіса кіраўніка ўкраінскай дзяржавы.

Гаворачы аб крамлёўскіх стратэгіях па далучэнні да РФ чужых тэрыторый, Зяленскі падкрэсліў, што “такія рэчы” Масква робіць “сілай зброі або палітычна”.

“Тое, што ён зрабіў у Беларусі, гэта без ахвяр і без крыві. Гэта пакуль што”, — сказаў украінскі прэзідэнт.

Паводле яго слоў, Расія здзейсніла “дыпламатычную акупацыю” Беларусі, у выніку якой “незалежная краіна” страціла суверэнітэт.

Вынікам гэтага стала поўнамаштабнае ўварванне расійскай арміі ва Украіну 24 лютага 2022 года ў тым ліку з беларускай тэрыторыі, з якой да таго ж ажыццяўляліся “ўдары ракетамі”, адзначыў Зяленскі.

Улады ў Мінску і асабіста Аляксандр Лукашэнка адкрыта падтрымліваюць расійскую агрэсію супраць Украіны, на пачатковым этапе вайны войскі РФ вялікімі сіламі заходзілі ў гэтую краіну і абстрэльвалі яе гарады ракетамі з тэрыторыі Беларусі.

У 2023 годзе Масква і Мінск заявілі аб размяшчэнні ў Беларусі расійскай тактычнай ядзернай зброі. Таксама Лукашэнка прадаставіў тэрыторыю краіны для баевікоў расійскай вайсковай кампаніі “Вагнер”.