ДзяржТБ назвала часовага паверанага ў справах Італіі ў Беларусі надзвычайным і паўнамоцным амбасадарам

10 сакавіка, Позірк. Часовы павераны ў справах Італіі ў Беларусі (на сайце італьянскай амбасады значыцца як кіраўнік місіі) Тамаза П’етра Маркеджані быў названы ў праграме “Галоўны эфір” на канале “Беларусь 1” 10 сакавіка надзвычайным і паўнамоцным амбасадарам краіны.

Інтэрв’ю з кіраўніком дыпмісіі было запісана падчас наведвання ім аднаго з матчаў Кубка Гагарына ў Мінску (прайшлі 6 і 8 сакавіка).

Аб прыбыцці Тамаза П’етра Маркеджані амбасада Італіі паведамляла 2 лістапада 2023 года. Дыпламат быў названы часовым павераным у справах, кіраўніком дыпмісіі, і, адпаведна, не мае даверчых грамат сваёй дзяржавы.

Пра тое, што Маркеджані прыбудзе ў статусе часовага паверанага і не будзе ўручаць даверчыя граматы, заявіў 17 кастрычніка мінулага года галоўны дарадца дэмлідара Святланы Ціханоўскай Франак Вячорка.

“Прынамсі такая дамоўленасць была з міністрам замежных спраў Італіі. <…> Мы знаходзімся ў рэгулярным кантакце з МЗС Італіі”, — адзначыў ён у сваім тэлеграм-канале.

17 кастрычніка папярэдні кіраўнік італьянскай дыпламатычнай місіі ў Беларусі (амбасадар) Марыа Бальдзі апублікаваў зварот, у якім паведаміў, што Маркеджані будзе “новым амбасадарам”.

Адзінай краінай ЕС, амбасадар якой уручыў граматы Аляксандру Лукашэнку пасля падзей 2020 года, з’яўляецца Венгрыя.

Тамаза П’етра Маркеджані нарадзіўся ў Мілане ў 1967 годзе. У 1992 годзе скончыў літаратурны факультэт Міланскага ўніверсітэта. На месца пасла ў Беларусі Маркеджані пераходзіць з пасады генеральнага консула Італіі ў Жэневе. У 2000–2004 гадах ён займаўся консульскай працай у Маскве, таксама працаваў у краінах Цэнтральнай і Паўночнай Еўропы. Ганараваны званнем кавалера ордэна “За заслугі перад Рэспублікай”.

(Будзе дапоўнена).