Колькасць шлюбаў за апошнія пяць гадоў зменшылася на 26,3%, разводаў — вырасла на 1,1%
8 красавіка, Позірк. У 2024 годзе ў Беларусі было заключана 46.242 шлюбы — на 26,3% менш, чым паводле вынікаў 2019-га, вынікае з праведзенага “Позіркам“ аналізу даных Нацыянальнага статыстычнага камітэта.
Агульная колькасць разводаў за пяць гадоў павялічылася на 1,1% (з 34.470 да 34.866).
У абодвух выпадках на першым месцы была Мінская вобласць, дзе колькасць шлюбаў за гэты перыяд знізілася на 30,2% (з 8.937 да 6.420), разводаў — вырасла на 9,9% (з 5.043 да 5.541).
Паводле колькасці шлюбаў лепш за ўсё — адносна іншых рэгіёнаў — сітуацыя ішла ў Мінску (зніжэнне з 15.208 да 11.589, або на 23,8%), разводаў — у Магілёўскай вобласці (зніжэнне з 4.054 да 4.026, або на 0,7%).
