Маркеджані прыбудзе ў статусе часовага паверанага і не будзе ўручаць даверчыя граматы — Вячорка

17 кастрычніка, Позірк. Дыпламат Тамаза П’етра Маркеджані, паводле інфармацыі галоўнага дарадцы Святланы Ціханоўскай Франака Вячоркі, прыбудзе ў Беларусь у статусе часовага паверанага і не будзе ўручаць даверчыя граматы Аляксандру Лукашэнка.

“Прынамсі такая дамоўленасьць была з міністрам замежных справаў Італіі. <…> Мы знаходзімся ў рэгулярным кантакце з МЗС Італіі”, — адзначыў ён у сваім тэлеграм-канале.

17 кастрычніка дзейны кіраўнік італьянскай дыпламатычнай місіі ў Беларусі Марыё Бальдзі апублікаваў зварот, у якім паведаміў што Маркеджані будзе “новым паслом”.

Тамаза П’етра Маркеджані нарадзіўся ў Мілане ў 1967 годзе. У 1992 годзе скончыў літаратурны факультэт Міланскага ўніверсітэта.

На месца амбасадара ў Беларусі Маркеджані пераходзіць з пасады генеральнага консула Італіі ў Жэневе. У 2000–2004 гадах ён займаўся консульскай працай у Маскве, таксама працаваў у краінах Цэнтральнай і Паўночнай Еўропы.

Уганараваны званнем кавалера ордэна “За заслугі перад Рэспублікай”.