Ютубер, пра затрыманне якога паведаміла МУС, — палітвязень Ігнацюк, заяўляюць праваабаронцы

11 сакавіка, Позірк. Падазраваны ў “вымагальніцтве” і “экстрэмізме” ўладальнік ютуб-канала з Пінскага раёна (Брэсцкая вобласць), пра затрыманне якога МУС паведаміла 11 сакавіка, — гэта прызнаны палітвязнем блогер Аляксандр Ігнацюк, які знаходзіцца ў следчым ізалятары з ліпеня 2023 года, заяўляе праваабарончы сайт “Брэсцкая Вясна”.

Згодна са звесткамі праваабаронцаў, Ігнацюк быў затрыманы паводле арт. 361⁴ КК (садзейнічанне экстрэмісцкай дзейнасці).

Да 2003 года мужчына выдаваў незалежную рэгіянальную газету “Вячэрні Столін”, затым быў рэдактарам сайта “Пра Столін”.

У каментарыі МУС 11 сакавіка не называецца імя затрыманага. Адзначаецца, што гэта 52-гадовы жыхар Пінскага раёна, “раней судзімы за абразу прадстаўніка ўлады”.

Начальнік аддзела 6-га ўпраўлення ГУБАЗіК Павел Кухнавец заявіў, што мужчына, “з’яўляючыся ўладальнікам ютуб-канала, сістэматычна займаўся вымагальніцтвам у прадпрымальнікаў, пагражаючы іх абгаварыць”.

“Ён цынічна выкарыстоўваў ілжывую інфармацыю пра бізнесменаў, афармляючы яе ў выглядзе паўнавартасных відэаматэрыялаў, і, пагражаючы іх публікацыяй, змушаў ахвяр выплачваць грошы і аддаваць каштоўнасці. Ад дзеянняў вымагальніка пацярпелі трое жыхароў Столінскага раёна”, — сцвярджае прадстаўнік МУС.

Кухнавец таксама заявіў, што затрыманы “актыўна садзейнічаў экстрэмісцкай дзейнасці адпаведнага тэлеграм-канала, адміністратары якога знаходзяцца за мяжой”. “Ён сістэматычна праводзіў дыскрэдытацыю, збор кампраметуючай інфармацыі пра дзяржаўныя органы ўлады, спрабаваў працаўладкавацца ў экстрэмісцкія інтэрнэт-крыніцы”, — сказаў ён.

Распачатыя крымінальныя справы “за вымагальніцтва, паклёп у дачыненні да прэзідэнта, садзейнічанне экстрэмісцкай дзейнасці”.