У Мінску адмянілі паказы фільмаў расійскага рэжысёра Сакурава

11 сакавіка, Позірк. Мінскі кінатэатр Falcon Club адмяніў паказы фільмаў “Сонца” і “Казка” расійскага кінарэжысёра Аляксандра Сакурава.

“Сябры, са шкадаваннем паведамляем, што запланаваныя на 11–13 сакавіка прэм’еры з удзелам рэжысёра Аляксандра Сакурава і рэжысёра Аляксандра Залатухіна адмяняюцца па тэхнічных прычынах”, — гаворыцца ў паведамленні на старонцы кінатэатра ў “Фэйсбуку”.

Якія менавіта “тэхнічныя прычыны” прывялі да адмены паказаў, не ўдакладняецца. Грошы за квіткі гледачам кінатэатр паабяцаў вярнуць.

У каментары РБК рэжысёр заявіў, што няма “ніякай тэхнічнай прычыны”.

“Я не думаў, што так шмат у Беларусі бруду ў інтэрнэце. Нейкі асаблівы бруд. Неразумна, што мясцовы Мінкульт сам не дазволіў паказаць сваім маладым кінематаграфістам цікавыя прыклады мастацкай працы”, — сказаў рэжысёр.

Расійскае выданне адзначае, што супраць прыезду Сакурава ў Беларусь выступалі вядучы дзяржканала СТВ Рыгор Азаронак і дырэктар Нацыянальнай бібліятэкі, які нядаўна стаў дэпутатам парламента, Вадзім Гігін.

Гігін пацвердзіў, што прапагандысты “працавалі над тым”, каб рэжысёр не прыязджаў у Мінск, Азаронак заявіў, што “патрыятычная грамадскасць была настроена катэгарычна”, удакладняе РБК.

72-гадовы Сакураў — расійскі рэжысёр, які зняў больш за 50 мастацкіх і дакументальных фільмаў. Лаўрэат дзясяткаў расійскіх і міжнародных кінапрэмій і фестываляў.

Не падтрымаў расійскую анэксію Крыма ў 2014 годзе і напад РФ на Украіну ў 2022-м.