Алейнік правядзе перамовы з кіраўніцтвам і дзелавымі коламі Манголіі

14 сакавіка, Позірк. Візіт міністра замежных спраў Сяргея Алейніка ў Манголію запланаваны на 15–16 сакавіка, паведамляе прэс-служба знешнепалітычнага ведамства.

Адзначаецца, што беларуская дэлегацыя правядзе перамовы з “кіраўніцтвам краіны, міністрам замежных спраў Манголіі Батмунхійн Батцэцэг, кіраўнікамі іншых міністэрстваў і дзяржаўных органаў, а таксама наведае шэраг вытворчых аб’ектаў, прадпрыемстваў”. Запланаваныя сустрэчы з дзелавымі коламі.

12–13 сакавіка Алейнік знаходзіўся з візітам у Індыі. Падчас візіту прайшла яго сустрэча з міністрам замежных спраў гэтай краіны Субраманьямам Джайшанкарам, падчас якой абмяркоўваўся “ўвесь комплекс пытанняў двухбаковага парадку дня: ад палітыкі да гуманітарнага супрацоўніцтва”, а таксама “эканамічнае вымярэнне” двухбаковых адносін.

Пасольства Беларусі ў Манголіі было адкрытае 30 чэрвеня 2014 года, пасольства Манголіі ў Беларусі пачало працаваць толькі 21 траўня 2020 года.

Паводле звестак беларускага дыпламатычнага прадстаўніцтва, тавараабарот паміж дзвюма краінамі ў 2021 годзе склаў 43 млн 554,9 тыс. долараў. Пры гэтым з Беларусі ў Манголію было пастаўлена прадукцыі на 43 млн 540,1 тыс., а з Манголіі ў Беларусь — усяго на 14,8 тыс.

Даныя па гандлі за 2022 і 2023 гады не апублікаваныя.