Аб’яднанне “Зялёная сетка” на форуме ААН заклікала сусветную супольнасць адмовіцца ад нафты, газу і атамнай энергетыкі
Ірына Панядзельнік
14 сакавіка, Позірк. Свет павінен адмовіцца ад нафты, газу, вугалю, а таксама атамнай энергетыкі ў якасці іх альтэрнатывы, заявіла прадстаўніца беларускіх экалагічных арганізацый і ініцыятыў “Зялёная сетка” Ірына Панядзельнік 13 сакавіка ў Жэневе (Швейцарыя) на міжнародным форуме ААН.
Паводле яе слоў, якія перадае “Зялёны партал”, каб дасягнуць “мэтаў ўстойлівага развіцця для цяперашняга і будучых пакаленняў”, неабходна “тэрмінова вырашаць праблемы адсутнасці палітычнай волі, узброеных канфліктаў і лабіравання з боку карпарацый”.
Эколаг перакананая, што “самыя багатыя краіны, якія нясуць найбольшую адказнасць за гістарычныя выкіды, павінны стаць прыкладам для ўтрымання [экалагічнай сітуцыі] ў рамках планетарных межаў”. “Для гэтых дзяржаў патрэбныя <…> падыход, які выходзіць за рамкі ВУП, і забеспячэнне структурных змяненняў у эканамічнай сістэме”, — сказала Панядзельнік.
Гаворачы аб атамнай энергетыцы, як альтэрнатыве выкапнёвага паліва, яна заявіла, што “нельга спадзявацца на ілжывыя рашэнні або недаказаныя тэхналогіі, такія як ўлоўліванне вугляроду або геаінжынерыя, якія толькі прымусяць нас працягваць мадэль неэфектыўнага выкарыстання энергіі”.
“Мы не падтрымліваем развіццё ядзернай энергетыкі ў якасці альтэрнатывы і выступаем за адмову ад яе з-за яе ўнутранай бяспекі і цяжкага цяжару, які захоўванне ядзерных адходаў ускладае на навакольнае асяроддзе, біяразнастайнасць і супольнасці на многія тысячы гадоў наперад. Замест гэтага інвестыцыі павінны быць накіраваны на хуткае развіццё і ўкараненне аднаўляльных крыніц энергіі з станоўчым уздзеяннем на прыроду”, — лічыць прадстаўніца “Зялёнай сеткі”.
Яна заклікала ўрады краін рэгіёну распрацаваць “нацыянальныя планы адаптацыі да зменаў клімату”.
“У нашым рэгіёне не хапае кліматычнай адукацыі, таму мы прапануем інвеставаць у комплексныя праграмы на ўсіх узроўнях школьнай адукацыі і падтрымліваць кліматычных журналістаў для барацьбы з дэзінфармацыяй”, — сказала Панядзельнік.