У 2020 годзе беларускі народ прагаласаваў за іншую будучыню — кіраўнік МЗС Фінляндыі

18 сакавіка, Позірк. Разгляд сітуацыі ў Беларусі з’яўляецца “вельмі важнай тэмай сённяшняга пасяджэння” Савета ЕС па замежных справах, заявіла журналістам перад пачаткам мерапрыемства 18 сакавіка ў Бруселі міністр замежных спраў Фінляндыі Эліна Валтонен.

Паводле слоў чыноўніцы, “Беларусь у цяперашняй сітуацыі дыктатуры [Аляксандра] Лукашэнкі з’яўляецца не чым іншым, як саюзнікам [Уладзіміра] Пуціна”.

“У той жа час вольныя людзі Беларусі вырашылі па-іншаму, — падкрэсліла яна. — У 2020 годзе, амаль чатыры гады таму, яны прагаласавалі зусім за іншую будучыню. Для гэтых людзей мы мусім зрабіць усё магчымае, каб змяніць курс Беларусі ў больш дэмакратычным кірунку і, відавочна, вывесці Беларусь з вайны, каб яна больш не была магчымым паўночным фронтам для Пуціна, а таксама базай для размяшчэння расійскай ядзернай зброі”.

У парадак дня пасяджэння Савета ЕС па замежных справах 18 сакавіка ўключана абмеркаванне сітуацыі ў Беларусі. Чакаецца, што савет “абмяняецца меркаваннямі пра апошнія падзеі ў Беларусі, надаўшы асаблівую ўвагу пагаршэнню сітуацыі з правамі чалавека і працягваецца падтрымцы беларускім рэжымам агрэсіўнай вайны Расіі супраць Украіны”.

Прыводзіцца спасылка на прынятую 19 лютага заяву савета, у якой сярод іншага гаворыцца пра “нязменную падтрымку памкнення беларускага народа да стварэння свабоднай, дэмакратычнай, суверэннай і незалежнай Беларусі”.

На канферэнцыі “Хельсінкскі дыялог: дэмакратычная будучыня для Беларусі” 11 студзеня Валтонен выказала поўную падтрымку беларускім дэмсілам, а таксама выступіла за далейшы ціск на рэжым Лукашэнкі. Фінляндыя, паводле слоў міністра, працягне падтрымліваць працу кантактнай групы з дэмсіламі Беларусі ў Савеце Еўропы і платформы па зборы злачынстваў рэжыму, а таксама дзейнасць Еўрапейскага гуманітарнага ўніверсітэта ў Вільнюсе. Тое, што адбываецца зараз у Беларусі, “важна і для Фінляндыі, і для ўсяго Еўрапейскага саюза”, адзначыла тады чыноўніца.

7 сакавіка дэмакратычны лідар Святлана Ціханоўская сустрэлася ў Бухарэсце са старшынёй Еўрапейскай камісіі Урсулай фон дэр Ляен. Яна звярнула ўвагу суразмоўцы на праблемы з легалізацыяй беларусаў у краінах Еўрасаюза, а таксама выказала надзею, што кіраўніцтва ЕС працягне падтрымку беларускай грамадзянскай супольнасці, ціск на рэжым Аляксандра Лукашэнкі для вызвалення палітвязняў і супрацьдзеяння расійскай агрэсіі.