Гомельская пагрангрупа часова абмежавала ўезд і знаходжанне фізічных асоб у пагранічнай зоне трох раёнаў

18 сакавіка, Позірк. У Брагінскім, Лоеўскім і Хойніцкім раёнах Гомельская пагрангрупа ўзмацніла меры па кантролі за перамяшчэннем фізічных асоб у памежнай зоне, паведамляе прэс-служба Гомельскага гарвыканкама.

Удакладняецца, што “для забеспячэння памежнай бяспекі часова абмежаваны ўезд <…>, знаходжанне грамадзян у памежнай паласе на тэрыторыі Брагінскага, Лоеўскага і Хойніцкага раёнаў, выдача пропускаў таксама прыпыненая”.

Ведамства сцвярджае, што “мерапрыемствы маюць планавы характар”, а кантрольныя функцыі супрацоўнікі Гомельскай пагрангрупы “будуць ажыццяўляць як на аўтадарозе, так і на чыгунцы”.

“Беларусы могуць уязджаць у памежную зону па наступных дакументах: пашпарт грамадзяніна <…>, вадзіцельскае пасведчанне, ваенны білет, службовае пасведчанне. Для знаходжання ў памежнай зоне замежным грамадзянам патрабуецца пропуск, аформіць які можна на адзіным партале электронных паслуг (Е-Паслуга)”, — гаворыцца ў паведамленні.

На тэрыторыі Гомельскай вобласці ў 2024 годзе ўвядуць у строй дзве новыя пагранзаставы, яшчэ адну рэканструююць, заявіў старшыня аблвыканкама Іван Крупко 14 сакавіка на адкрыцці ў Мазырскім раёне заставы “Баравое” на мяжы з Украінай.

Заставу “Баравое” пачалі будаваць у 2022 годзе ў рамках праграмы “Удасканаленне пагранічнай бяспекі Саюзнай дзяржавы”.

Працягласць граніцы паміж Беларуссю і Украінай складае 1.084,2 км, з іх 758,3 км на сухапутным участку, 325,9 км — па рэках Днепр, Сож і Прыпяць, каля 120 км — у зоне адчужэння каля Чарнобыльскай АЭС.

24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль. У пачатку вайны расійскія войскі ўварваліся на ўкраінскую тэрыторыю ў тым ліку з боку Беларусі. Пасля таго, як захопнікі былі выгнаныя з паўночнай часткі Украіны, вайскоўцы пачалі мініраваць тэрыторыю, якая прымыкае да беларускай мяжы, працэс ідзе да гэтага часу.