Беларусь настойліва дамагаецца супрацы з Сербіяй

20 сакавіка, Позірк. “Стан і перспектывы” супрацоўніцтва Мінска і Бялграда “на асноўных напрамках узаемадзеяння” абмеркаваў 19 сакавіка амбасадар Беларусі Сяргей Маліноўскі з в.а. намесніка міністра замежных спраў Сербіі Тамарай Раставац Сіямашвілі, паведамляе прэс-служба беларускага знешнепалітычнага ведамства.

На сустрэчы быў “падкрэслены дружалюбны характар узаемаадносін”. Бакі разгледзелі “магчымыя крокі па актывізацыі супрацы з задзейнічаннем існых механізмаў развіцця двухбаковага дыялога”.

Каля месяца таму, 21 лютага, Маліноўскі абмяркоўваў перспектывы гандлёва-эканамічнага супрацоўніцтва з іншым прадстаўніком сербскага МЗС — в.а. намесніка міністра па пытаннях эканамічнай дыпламатыі Ягадай Лазарэвіч. Тады было заяўлена, што бакі, зацікаўленыя ў “пашырэнні эканамічнага ўзаемадзеяння”, абазначылі крокі, “што спрыяюць яго актывізацыі па найбольш запатрабаваных кірунках”.

14 лютага амбасадар правёў перагаворы з дырэктарам Інстытута міжнароднай палітыкі і эканомікі Сербіі Браніславам Джорджавічам.

На сустрэчы 9 лютага Маліноўскі і дзяржсакратар сербскага МЗС Горан Алексіч “акрэслілі крокі па далейшых кантактах і ўзаемадзеянні ў палітычнай, гандлёва-эканамічнай сферы, а таксама на іншых напрамках”.

2 лютага беларускі дыпламат уручыў даверчыя граматы прэзідэнту Сербіі Аляксандру Вучычу. Яны абмеркавалі “перспектывы актывізацыі двухбаковага палітычнага дыялогу”, “актуальныя аспекты беларуска-сербскага ўзаемадзеяння з акцэнтам на магчымасці пашырэння эканамічных сувязей”.

Аляксандр Лукашэнка, віншуючы Вучыча з Днём дзяржаўнасці 15 лютага, назваў Сербію “важным і надзейным партнёрам” Беларусі ў Еўропе і выказаў зацікаўленасць у “дынамічным развіцці шматгранных двухбаковых кантактаў у духу ўзаемнай павагі і падтрымкі”. “Далейшае паглыбленне ўсяго комплексу беларуска-сербскіх стасункаў з апорай на плённае эканамічную супрацу цалкам адпавядае інтарэсам нашых брацкіх народаў”, — адзначыў ён.

Лукашэнка, прызначаючы 20 лістапада 2023 года Маліноўскага амбасадарам у Сербіі і Паўночнай Македоніі па сумяшчальніцтве, заявіў, што Бялграду трэба “разабрацца ў той палітыцы”, якую ён “праводзіць і жадае правадзіць у дачыненні да Беларусі”.

“Калі яны хочуць [супрацоўнічаць з Беларуссю], павінен быць вынік у гандлёва-эканамічных стасунках, — сказаў ён. — Калі яны хочуць віляць хвастом, груба кажучы, і падтрымліваць еўрапейска-амерыканскія санкцыі супраць Беларусі, гэта іх праца, няхай вызначаюцца і падтрымліваюць, калі яны забыліся пра тое дабро, з якім мы ішлі да іх”.

У 2021 годзе Сербія далучылася да санкцый ЕС супраць Мінска, пасля расійскага ўварвання ва Украіну падтрымала наступныя пакеты абмежаванняў.

Напрыканцы студзеня 2022 года беларускі ўрад распаўсюдзіў на Сербію прадуктовае эмбарга, уведзенае ў адказ на санкцыі. Цяпер яно падоўжанае да канца 2024 года.

Пры гэтым Сербія 25 кастрычніка 2019 года падпісала пагадненне аб зоне свабоднага гандлю з Еўразійскім эканамічным саюзам, у які ўваходзіць Беларусь. Дакумент набыў моц 10 ліпеня 2021 года.

У 2022 годзе тавараабарот паміж Беларуссю і Сербіяй склаў 175,4 млн долараў (97,7% да ўзроўню 2021 года), беларускі экспарт — 100,4 млн (81,1%), імпарт — 75,0 млн (134,6%).