ДДБ Літвы не знайшоў у краіне пагрозлівых арганізаваных груп “літвіністаў”

20 сакавіка, Позірк. У Літве “няма арганізаваных груп, якія прапагандуюць ідэалогію літвінізму”, якія маглі б “уяўляць пагрозу незалежнасці, канстытуцыйнаму ладу і тэрытарыяльнай цэласнасці краіны”, заяўляе Дэпартамент дзяржаўнай бяспекі (ДДБ) гэтай балтыйскай краіны.

З адпаведнай заявай ДДБ выступіў у сувязі з “павелічэннем у апошнія тыдні колькасці электронных лістоў, якія рассылаюцца літоўскім палітыкам і грамадскім дзеячам, з пагрозамі ад груп, якія нібыта прапагандуюць ідэалогію літвінізму”.

Спецслужба таксама адрэагавала на спробы ў сацсетках “завербаваць літоўцаў для напісання лозунгаў гэтай ідэалогіі ў грамадскіх месцах за грашовую ўзнагароду”. На думку ДДБ, “такая дзейнасць адпавядае асаблівасцям псіха-інфармацыйных аперацый, арганізаваных варожымі Літве дзяржавамі і скіраваных на стварэнне панікі ў грамадстве краіны”.

“Пад выглядам літвінізму таксама робяцца спробы дыскрэдытаваць дэмакратычную апазіцыю ў Беларусі і выклікаць варожасць літоўскіх грамадзян з беларусамі, якія жывуць у краіне”, — звярнула ўвагу ведамства. Адзначана, што ў дэпартаменце “адсочваюць працэсы, якія адбываюцца ў новай беларускай дыяспары ў Літве, з мэтай выяўлення і прадухілення рызык і пагроз нацбяспецы”.

На пачатак 2024 года, паводле даных Дэпартамента міграцыі МУС, у Літве пражывала 62 тыс. 165 грамадзян Беларусі. Беларусы былі другой па колькасці групай замежнікаў, якія пражываюць у Літве, пасля ўкраінцаў. Летась у краіну з мэтай пражывання прыбылі 15 тыс. 817 чалавек, з якіх 150 — грамадзяне Літвы.

Пры гэтым “у сувязі з узрослай пагрозай, якую рэжымы Расіі і Беларусі працягвалі прадстаўляць для Літвы”, у 2023 годзе літоўскімі ўладамі “праводзіліся розныя мэтавыя мерапрыемствы па кантролі над грамадзянамі гэтых краін”.

У прадстаўленым 7 сакавіка штогадовым дакладзе ДДБ і Другога дэпартамента аператыўных службаў (ДДАС) Міністэрства абароны сярод іншага гаворыцца пра пераследы беларускімі спецслужбамі супрацоўнікаў дыпламатычнай місіі Літвы і пра тое, што рэжым Аляксандра Лукашэнка пашырыў выведвальныя аперацыі за мяжой і узмацніў унутраную контрвыведку.

Сцвярджаецца, што беларускія выведвальныя службы “нядаўна пачалі ўстанаўліваць і аднаўляць кантакты з членамі беларускай дыяспары [у Літве] і вербаваць новых агентаў, выкарыстоўваючы сучасныя метады аддаленай сувязі”.

Некаторыя прадстаўнікі беларускай дыяспары “прапагандуюць радыкальныя палітычныя ідэалогіі, такія як літвінізм”, лічаць у Вільнюсе.

“Мне б вельмі хацелася, каб літоўскі ўрад і спецслужбы не выкарыстоўвалі беларускае няшчасце і боль у палітычных мэтах”, — такім чынам дэмакратычны лідар Святлана Ціханоўская пракаментавала 8 сакавіка журналістам сцвярджэнні спецслужбаў.

“Мы чакаем і шукаем салідарнасці. Мы сапраўды заплацілі высокую цану за нашу свабоду і незалежнасць. Я найперш хацела б, каб літоўцы зразумелі, што адбываецца. Вядома, літоўскія службы павінны выяўляць тых, хто можа працаваць на КДБ. Але я сумняваюся, што такіх шмат”, — падкрэсліла яна.