20 сакавіка, Позірк. Дэлегацыі Еўрасаюза, 25 дзяржаў, а таксама 11 міжнародных праваабарончых арганізацый падтрымалі даклад вярхоўнага камісара ААН па правах чалавека “Становішча з правамі чалавека ў Беларусі напярэдадні прэзідэнцкіх выбараў 2020 года і пасля іх”.
Абмеркаванне дакумента ў інтэрактыўным фармаце адбылося 20 сакавіка на 55-й сесіі Савета ААН па правах чалавека (СПЧ).
Прадстаўляючы даклад, дырэктар Упраўлення палявых аперацый і тэхнічнага супрацоўніцтва ўпраўлення вярхоўнага камісара ААН па правах чалавека (УВКПЧ) Крысціян Салазар Фолькман пацвердзіў наяўнасць падстаў кваліфікаваць учыненыя беларускімі ўладамі дзеянні як “злачынствы супраць чалавечнасці”.
Ён заклікаў Беларусь да неадкладнага вызвалення палітвязняў і спынення пераследу грамадзянскай супольнасці, незалежных СМІ і апазіцыі.
У падтрымку дакладу выступілі дэлегацыі Аўстраліі, Аўстрыі, Албаніі, Бельгіі, Балгарыі, Вялікабрытаніі, Германіі, Грэцыі, ЕС, Ірландыі, Кіпра, Ліхтэнштэйна, Люксембурга, Мальты, Малдовы, Польшчы, Румыніі, Славакіі, ЗША, Украіны, Францыі, Харватыі, Чарнагорыі, Чэхіі, Швейцарыі і Швецыі, а таксама ўсе праваабарончыя арганізацыі, якія выступілі.
Не падтрымалі даклад у той ці іншай ступені, заклікаўшы ўстрымацца ад “палітызацыі” пытання правоў чалавека, дэлегацыі 19 краін: Азербайджана, Бурундзі, Венесуэлы, Егіпта, Ірана, Зімбабвэ, Камбоджы, Кітая, КНДР, Кубы, Лаоса, Нігера, Нікарагуа, Расіі, Сірыі, Судана, Таджыкістана, Шры-Ланкі і Эрытрэі.
З рэзкай крытыкай дакумента выступіла пастаянны прадстаўнік Беларусі пры Аддзяленні ААН і іншых міжнародных арганізацыях у Жэневе Ларыса Бельская.
Падрабязнасці даступныя падпісчыкам “Позірк+”
