Вайсковая прысутнасць РФ у Беларусі прадстаўленая ў асноўным “абслугоўваючым персаналам” — памежная служба Украіны

25 сакавіка, Позірк. На тэрыторыі Беларусі застаецца пэўная колькасць расійскіх вайскоўцаў, але гэта “больш абслугоўваючы персанал, які забяспечвае абслугоўванне тэхнікі”, заявіў у эфіры нацыянальнага тэлемарафона 24 сакавіка спікер Дзяржаўнай памежнай службы Украіны Андрэй Дземчанка.

Паводле яго слоў, якія перадае РБК-Украіна, сітуацыя на мяжы з Беларуссю не мяняецца і “застаецца кантраляванай”. “Па той бок мяжы мы не бачым, каб у Расіі былі нейкія сілы для таго, каб прадстаўляць на гэты момант пагрозу”, — сказаў Дземчанка, падкрэсліўшы, што РФ “у свой час вывела ўсе свае падраздзяленні, якія праходзілі там навучанне, а новых у рамках ратацыі не завяла”.

Прадстаўнік памежнага ведамства адзначыў, што падраздзяленні ўкраінскай выведкі адсочваюць сітуацыю на тэрыторыі Беларусі, каб у выпадку пагрозы “даць адказ”. Таксама гэты кірунак працягваюць умацоўваць — гаворка ідзе як аб інжынерных умацаваннях па лініі мяжы, так і фартыфікацыі на прыгранічных тэрыторыях.

22 лютага беларускі міністр абароны Віктар Хрэнін заявіў у інтэрв’ю тэлеканалу “Расія-24”, што Узброеныя сілы Украіны засяродзілі на мяжы з Беларуссю “ўдарную групоўку” колькасцю 112–114 тыс. чалавек.

У справаздачы за 2023 год камандавання Аб’яднаных сіл УС Украіны адзначалася, што, нягледзячы на “інтэнсіўныя перамяшчэнні частак і падраздзяленняў ворага па тэрыторыі Беларусі і заходніх абласцях РФ у першым паўгоддзі” 2023 года, пастаянны маніторынг актыўнасці паказвае, што “на гэты момант няма прыкмет фарміравання ўдарных груповак войскаў”.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль.